Jalgaon News : खानदेशात टंचाई जाणवू लागली असून, पुढे सुमारे एक हजार गावांत पाण्याची समस्या राहू शकते, असा अंदाज प्रशासनास आहे. जळगावात सुमारे ५९२ , धुळ्यात ३०० आणि नंदुरबारातही सुमारे २१५ गावांत टंचाई राहील, अशी शक्यता आहे.

धुळ्यात २० टक्के, नंदुरबारात १९ टक्के एवढी पावसाची तूट होती. धुळ्याचे एकूण पर्जन्यमान ५७५ मिलीमीटर, नंदुरबारचे ८६० मिलीमीटर एवढे पाऊसमान आहे. परंतु दोन्ही जिल्ह्यांत जवळपास ८० टक्केच पाऊस झाला.

धुळ्यातील टंचाई अधिक तीव्र राहील. तसेच सातपुडा पर्वतातहीही टंचाईची समस्या राहणार आहे. नंदुरबार, नवापूर तालुक्यात टंचाई अधिक राहील. धुळ्यात साक्री, धुळे व शिंदखेडा तालुक्यास दुष्काळाची झळ अधिक बसेल, अशीही स्थिती आहे.

जळगाव जिल्ह्यात यंदा केवळ ८८.८ टक्के पाऊस झाला आहे. तब्बल बारा टक्के पाऊस कमी झाला आहे. यामुळे जिल्ह्यात संभाव्य ५९२ गावांमध्ये पाणीटंचाई जाणवेल असा प्राथमिक अंदाज जिल्हा प्रशासनाने वर्तविला आहे.

त्यासाठी ९ कोटी ९० लाख रुपयांचा टंचाई कृती आराखडा जिल्हाधिकारी आयुष प्रसाद यांनी मंजूर केला आहे. लवकरच हा आराखडा शासनाला सादर केला जाईल. २०२३-२४ साठी जिल्ह्यातील संभाव्य पाणीटंचाई कृती आराखडा जिल्हा परिषदेच्या पाणीपुरवठा विभागामार्फत तयार करण्यात आला.

यात जिल्ह्यात आगामी काळात ५९२ गावांमध्ये संभाव्य पाणीटंचाई जाणवणार असल्याची शक्यता असून उपाययोजना राबविण्यासाठी ९ कोटी ९० लाख ७४ हजार रुपयांचा खर्च लागणार आहे. हा आराखडा जिल्हाधिकाऱ्‍यांना सादर करण्यात आला होता. यास जिल्हाधिकारी यांनी मंजुरी दिली आहे.

चाळीसगावात टँकर सुरूच

जिल्ह्यातील चाळीसगाव तालुक्यात पावसाळा संपूनही पाणीटंचाईची परिस्थिती कायम आहे. त्यामुळे चाळीसगाव तालुक्यातील १३ गावांमध्ये १४ टँकरद्वारे पाणीपुरवठा केला जात आहे.

जळगावात संभाव्य

पाणीटंचाईची गावे

तालुका गावे

जळगाव २१

जामनेर ६९

मुक्ताईनगर २०

पाचोरा २५

अमळनेर १०९

भडगाव १७

सावळ ९

बोदवड १२

चाळीसगाव ५७

चोपडा ८७

धरणगाव ३१

एरंडोल २८

पारोळा ८५

रावेर ९

यावल १३

एकूण ५९२