Latur News : लातुर जिल्ह्यात रविवारी (ता. २) सायंकाळी जोरदार पूर्वमोसमी पाऊस झाला. वादळी वाऱ्यासह झालेल्या पावसाने झाडे उन्मळून पडली तरी भाजापाला व फळपिकांचे नुकसान झाले.

जळकोट, अहमदपूर, चाकूर, निलंगा, औसा, उदगीर व देवणी तालुक्यांत पावसाने हजेरी लावली. यात वीज पडून वागदरी येथील कोपीत थांबलेले शेतकरी भाऊवराव वाकसे (वय ७०) यांचा मृत्यू झाला.

सकाळपासूनच जिल्ह्यात ढगाळ वातावरण होते. कधी ऊन तर कधी सावलीत वातावरणात उकाडा होता. यातच ढग दाटून काही भागांत दुपारनंतर तर काही भागांत सायंकाळी जोरदार पावसाला सुरुवात झाली.

यात काही भागांत तासभर पाऊस पडत होता. यामुळे नाल्यांतून मोठ्या प्रमाणात पाणी वाहिले. काही भागात झाडे उन्मळून पडल्याने रस्त्यावरील वाहतूक ठप्प झाली.

यात अहमदपूर येथील उमाजी हारणे यांचे दोन बैल, सताळा बुद्रुक (ता. उदगीर) येथील त्र्यंबक वाघमारे यांची एक म्हैस तर गुडसुर येथील राजपाल मुस्कावाड यांची एक म्हैस वीज पडून मरण पावली. कुणकी (ता. जळकोट) येथे घरांवरील पत्रे उडाले तर शेतात रचून ठेवलेला कडबा अस्ताव्यस्त झाला. वादळामुळे वीजपुरवठा खंडित झाला होता.