Parbhani KVK News : परभणी येथील कृषी विज्ञान केंद्रातर्फे परभणी जिल्ह्यातील ११ गावांमध्ये पर्यावरणपूरक जीवनपद्धती अभियानअंतर्गत खरीपपूर्व नियोजन अभियान तसेच जनजागृती मोहीम राबविण्यात आली.

कृषी विज्ञान केंद्राचे वरिष्ठ शास्त्रज्ञ तथा प्रमुख डॉ. प्रशांत भोसले यांच्या मार्गदर्शनाखाली हिंगला, सनपुरी, साळापुरी, पेडगाव, एकरुखा, आळंद, जांब, सोन्ना, तरोडा (सर्व ता. परभणी) माक व कसर (ता. जिंतूर) या गावांमध्ये खरीपपूर्व नियोजन अभियान व जनजागृती मोहिमेचे आयोजन करण्यात आले होते.

पीक संरक्षण विषय विशेषज्ञ डॉ. अमोल काकडे, पीकशास्त्र विषय विशेषज्ञ सवाई सिंग निठरवाल, मृदा विज्ञान प्रयोगशाळा तज्ज्ञ सी. आर. देशमुख आदी यामध्ये सहभागी झाले होते.

पेडगाव येथे आयोजित कार्यक्रमात डॉ. काकडे म्हणाले, की खरीप हंगामात विविध पिकांवर शंखी गोगलगाय, मिलीपीड (पैसा), हुमणी अळी, शेंदरी बोंड अळीचे व्यवस्थापन व नियंत्रण एकात्मिक पद्धतीने करावे.

निठारवाल म्हणाले, की पेरणीपूर्व मशागत, बियाणे व वाणांची निवड, बीजप्रक्रिया, तण व पाणी व्यवस्थापन, खत व्यवस्थापन, यांत्रिक पद्धतीचा वापर, बीबीएफ तंत्रज्ञानाचा वापर मोठ्या प्रमाणात करावा.

देशमुख म्हणाले, की माती परीक्षणावर आधारित खताचे व्यवस्थापन करावे. या वेळी मातीचा नमुना घेण्याचे प्रात्यक्षिक सादर केले. या अभियानामध्ये शेतकरी मोठ्या संख्येने सहभागी झाले होते.