Agricultural Drone : कृषी विज्ञान केंद्र खामगाव येथे ड्रोनचे प्रशिक्षण

गेवराई, जि. बीड : शेतीतील ड्रोन (Agricultural Drone) वापरा विषयी जागृती व प्रसार करण्याकरिता वसंतराव नाईक मराठवाडा कृषी विद्यापीठ Vasantrao Naik Marathwada Agricultural University), परभणी अंतर्गत कृषी विज्ञान केंद्र, खामगाव येथे कृषी अभियांत्रिकी विभागामार्फत ‘शेतीसाठी ड्रोनचा वापर’ (Drone) या विषयावर एक दिवसीय प्रशिक्षण व प्रात्यक्षिक कार्यक्रम मंगळवारी (ता. २४) घेण्यात आला.

या प्रात्यक्षिककरिता गरुडा एरोस्पेस प्रायव्हेट लिमिटेड कंपनी, चेन्नई यांच्याकडून ड्रोन व पायलट यांची उपलब्धता करून देण्यात आली.

यावेळी कार्यक्रम समन्वयक प्रा. दीप्ती पाटगावकर, जिल्हा अधीक्षक, कृषी अधिकारी श्री. जेजुरकर, तालुका कृषी अधिकारी श्री. वडकुते, सरपंच श्री. डींगरे उपस्थित होते. या प्रशिक्षण व प्रात्यक्षिक कार्यक्रमांमध्ये ड्रोन विषयी विस्तृत अशी माहिती सोबतच त्याच्या वापराचे निकष याविषयी विशेषज्ञ कृषी अभियांत्रिकी विभाग डॉ. तुकेश सुरपाम यांनी मार्गदर्शन केले.

तालुका कृषी अधिकारी श्री. वडकुते, जिल्हा अधीक्षक कृषी अधिकारी श्री. जेजुरकर यांनी ड्रोन हे शेतीसाठी कसे फायदेशीर आहे हे शेतकऱ्यांना सांगितले.

अध्यक्षीय भाषणात कार्यक्रम समन्वयक प्रा. पाटगावकर यांनी ड्रोनचे शेतीतील वापर व त्यामुळे होणारे भविष्यातील फायदे याविषयी माहिती दिली. प्रक्षेत्रावर असलेल्या हरभरा पिकामध्ये ड्रोनचे प्रात्यक्षिक देण्यात आले.

प्रात्यक्षिक देताना डॉ. सूरपाम यांनी उपलब्ध असलेल्या ड्रोनचे प्रकार, मॅनुअल व ऑटोमॅटिक सिस्टम, वापरण्याची पद्धत, ड्रोन वापरासाठी लागणारे प्रमाणपत्र, केंद्राकडून मिळणारे अनुदान व इतर महत्त्वाची माहिती दिली.