Sangli News : जिल्ह्यात पर्जन्यमान कमी झाल्याने खरीप हंगामातील पिकांचे नुकसान झाले. परिणामी खरिपातील पिकांच्या उत्पादनात ६० टक्के घट असल्याचा प्राथमिक अंदाज कृषी विभागाने केलेल्या सर्वेक्षणातून समोर आला आहे. त्यामुळे शेतकरी आर्थिक कचाट्यात सापडला आहे.

जिल्ह्यात खरीप हंगामाचे सरासरी क्षेत्र २ लाख ५५ हजार ९८४ हेक्टर आहे. हंगामाच्या प्रारंभापासून पावसाने दडी मारली. परिणामी शेतकऱ्यांनी खरीप हंगामातील पिकांच्या पेरणीचे नियोजन कोलमडले. परंतु पाऊस पडेल या आशेवर यंदाच्या खरीप हंगामात १ लाख ५३ हजार ६६ हेक्टरवर पेरा झाला.

जिल्ह्यात यंदा पावसाने पाठ फिरवली. जून महिन्याच्या दुसऱ्या आठवड्यात पावसाला सुरुवात झाली. परंतु त्यानंतर पाऊस उघडला. जून महिन्यात ३५.७, जुलैमध्ये १७२.१, ऑगस्टमध्ये ३३.३, सप्टेंबरमध्ये ११२.४ मिलिमीटर पावसाची नोंद झाली.

वास्तविक, आटपाडी, कवठेमहांकाळ, जत, तासगाव, खानापूर या दुष्काळी तालुक्यांत पुरेसा पाऊस झाला नसल्याने कडधान्याच्या पेरण्या झाल्याच नाहीत.

त्यातच अनेक गावांत २१ दिवसांहून अधिक काळ पावसाचा खंड पडला. त्यामुळे खरीप हंगामातील पिके पाण्याअभावी वाळून गेली. तर काही ठिकाणी हलका पाऊस तर काही भागांत रिमझिम सुरू होती, त्यामुळे पिके जगली. परंतु पुरेशी वाढ झाली नाही. पावसाने दडी मारल्याने हाताशी आलेली पिकेही डोळ्यादेखत जळून गेली.

कृषी विभागाने शेतकऱ्यांना २५ टक्के अग्रिम भरपाईसाठी सर्वेक्षण केले. त्यात बाजरी, उडीद, मूग, सोयाबीन, ज्वारी, मका, भुईमूग या पिकांचे मोठे नुकसान झाले आहे. सर्वेक्षणातून पिकांच्या उत्पादनात ६० टक्के घट होणार असल्याची शक्यता कृषी विभागाने व्यक्त केली. परंतु पीक कापणीनंतर उत्पादनात किती घट होईल, हे निश्चित होणार असल्याचेही कृषी विभागाने सांगितले आहे.