Jalgaon News : पीकविमा योजनेत फसवणूक झाल्याच्या भावनेतून चिनावल (ता. रावेर) येथील ग्रामस्थांनी आमदार, खासदार- मंत्र्यांना गावबंदीचा इशारा दिला आहे. तसेच पीकविमा योजनेत मदत न मिळाल्यास मतदानावर बहिष्कार टाकण्याचा इशारा देण्यात आला.

सगळीकडे आगामी लोकसभा निवडणुकीच्या तयारीचे वारे वाहू लागले असताना केळी उत्पादकांना पीकविम्यांची रक्कम न मिळाल्याच्या कारणावरून खानदेशातील ग्रामीण भागातील वातावरण तापायला सुरुवात झाली आहे. चिनावल येथील सुमारे दोनशे हेक्टर केळी क्षेत्रांवर केळी उत्पादकांनी पीकविमा घेऊनही केळी उत्पादक शेतकऱ्यांची फसवणूक झाल्याची या भागातील शेतकऱ्यांची भावना आहे.

तरुण शेतकरी आक्रमक

रोषात तरुण शेतकऱ्यांनी पुढाकार घेत विमा कंपनी व लोकप्रतिनिधी शेतकऱ्यांबाबत अनास्था दाखवत असल्याबद्दल रोष व्यक्त केला व गावात येणाऱ्या‍ प्रमुख रस्त्यावर गावबंदीचे फलक लावण्यात यावे. असे ठरले. चिनावल परिसरात मोठ्या प्रमाणावर केळी विमा घेतला आहे.

शेतकऱ्यांच्या पिकांचे विमा कंपनी निकषानुसार नुकसान होवूनही भरपाई मिळत नसल्याने विमा आमच्या हक्काचा नाही कुणाच्या बापाचा, आमदार, खासदार व मंत्री ना गावबंदी झालीच पाहिजे व मतदानावर बहिष्कार अशा विविध घोषणांनी परिसर दणाणून गेला.

पीकविमा योजनेत केळी उत्पादकांची फसवणूक झाली आहे. शेतकऱ्यांना सरसकट पीकविमा मिळाला पाहिजे. ही प्रमुख मागणी आहे, अशी मागणी करण्यात आली.

मदत नाही, दौरे नाहीत...

कंपनीच्या निकषानुसार सदर शेतकरी विमा मिळण्यास पात्र असतानाही दिवाळीआधी ही रक्कम पात्र शेतकऱ्यांना मिळणे अपेक्षित असताना, अजूनही मिळाली नसल्याने आज चिनावल येथील शेतकऱ्यांनी आक्रमक होत बस स्टँडवर शेकडो शेतकऱ्यांनी बैठक घेत जोपर्यंत शेतकऱ्यांना विमा मिळणार नाही तोपर्यंत चिनावल येथे कोणताही मंत्री, आमदार, खासदार यांना पूर्ण गावबंदी करण्याचा ठराव करण्यात आला.