Crop Insurance : परभणीत पीकविमा दाव्याच्या ४३ हजारांवर पूर्वसूचना नामंजूर

Parbhani News : २०२३ च्या नोव्हेंबर महिन्याच्या अखेरीस मॉन्सुनोत्तर पावसामुळे जिल्ह्यातील खरीप पिकांचे मोठे नुकसान झाले आहे. पंतप्रधान पीकविमा योजनेतील स्थानिक नैसर्गिक आपत्ती (लोकल नॅचरल कॅलॅमिटीज) या जोखीम बाबींअंतर्गंत पीकविमा भरपाई मिळण्यासाठी पीकविमाधारक शेतकऱ्यांनी ८३ हजार ३१ पूर्वसूचनाद्वारे खरीप पिकांच्या नुकसानीची माहिती विमा कंपनीकडे सादर केली.

त्यापैकी ३९ हजार १२९ पूर्वसूचना मंजूर तर ४३ हजार ०९२ पूर्वसूचना नामंजूर करण्यात आल्या आहेत, अशी माहिती कृषी विभागाच्या सूत्रांनी दिली. ता. २७ नोव्हेंबर रोजी परभणी जिल्ह्यात सरासरी ६५ मिलीमीटर पाऊस झाला.

परभणी, जांब, झरी, सिंगणापूर, पिंगळी, जिंतूर, सावंगी म्हाळसा, बामणी, बोरी, आडगाव बाजार, चारठाणा, वाघी धानोरा, दूधगाव, देऊळगाव, कुपटा, कोल्हा, ताडबोरगाव, कासापुरी पूर्णा, ताडकळस, लिमला, कात्नेश्वर, चुडावा या २३ मंडलांमध्ये अतिवृष्टी झाली.

वादळी वाऱ्यामुळे तुरीचे पीक आडवे झाले. नाले, नद्यांच्या पुराचे पाणी पिकांमध्ये शिरले. वेचणी राहिलेला कापूस गळून पडला. भिजल्याने प्रत खराब झाली. त्यानंतरचे दोन दिवस पाऊस सुरुच राहिल्यामुळे पीकनुकसानीत वाढ झाली. परभणी जिल्ह्यात यंदा (२०२३) च्या खरिपात तुरीची ३७ हजार हेक्टर पेरणी झाली आहे.

शेतकऱ्यांनी ९७ हजार ६१७ प्रस्तावाव्दारे ३४ हजार ९९ हेक्टरवरील तूर पिकांसाठी विमा संरक्षण घेतले आहे. कपाशीची १ लाख ९२ हजार २१३ हेक्टरवर लागवड आहे. शेतकऱ्यांनी १ लाख ४१ हजार ९९६ प्रस्तावांद्वारे ७९ हजार ३२४ हेक्टरवरील कपाशीचे पीक विमा संरक्षित केले आहे. शेतकऱ्यांनी विविध माध्यमातून पीकनुकसानीच्या पूर्वसूचना विमा कंपनीकडे सादर केल्या आहेत.

पंतप्रधान पीकविमा खरीप पीकविमा पूर्वसूचना स्थिती

तालुका मंजूर पूर्वसूचना नामंजूर पूर्वसूचना एकूण पूर्वसूचना

परभणी ३५८६ ५८४६ ९४३२

जिंतूर ७४४१ १११२० १८५६१

सेलू ३३८० ५५११ ८८९१

मानवत १७८१ १६२५ ३४०६

पाथरी ३३९९ २६३१ ६०३०

सोनपेठ ७०१ १५९६ २२९७

गंगाखेड ४९९८ ४९५१ ९९४९

पालम ५३९७ ४२३६ ९६३३

पूर्णा ८४४६ ६३८२ १४८२८