Milk Subsidy : शासनाने काढलेल्या परिपत्रकाप्रमाणे दुधाला ३४ रुपये हमीभाव मिळावा, वंचित दूध उत्पादक शेतकऱ्यांना अनुदान मिळावे, अशा विविध मागण्यांसाठी पुणे येथील दुग्ध विकास कार्यालयासमोर शिवधर्म फाउंडेशनच्या वतीने बोंबाबोंब आंदोलन मंगळवारी (ता. १८) केले. मागण्या मान्य न झाल्यास महसूलमंत्री राधाकृष्ण विखे पाटील यांच्या घरासमोर बेमुदत उपोषण करण्याचा इशारा शिवधर्म फाउंडेशनचे संस्थापक दीपक काटे यांनी दिला.

श्री. काटे म्हणाले, की दूध व्यवसाय हा पूर्वी जोडधंदा म्हणून पाहिला जात होता. कारण नागरिकांकडे शेती मोठ्या प्रमाणात होती. त्यामुळे शेतीतील कामे भरपूर प्रमाणात असत व दुग्ध व्यवसाय हा जोडधंदा होता.

पण आताच्या काळामध्ये वाढती महागाई आणि जमिनीचे होत जाणारे वाटे पाहता दुग्ध व्यवसाय हा मुख्य व्यवसाय बनला आहे. दुधाला ३४ रुपये हमीभाव देण्याचे परिपत्रक शासनाकडून काढण्यात आले होते. परंतु त्यापेक्षा कमी दर मिळत असल्याने दुग्ध व्यावसायिक त्रस्त आहे. त्यामुळे बोंबाबोंब आंदोलन केले. या आंदोलनामध्ये शेतकरी व दुग्ध व्यावसायिक सहभागी झाले होते.

सहकारी दूध संघ वाढवून खासगी दूध संघ कमी झाले पाहिजेत. खासगी दूध संघाच्या मनमानी कारभारामुळे आज शेतकऱ्याची मोठ्या प्रमाणावर कुचंबणा होत आहे. खासगी दूध संघाच्या मदतीने दूध घेतले जाते. शेती कमी राहिल्यामुळे काही शेतकऱ्यांना गाईचा चारा हा विकत घ्यावा लागत आहे. गाईचा चारा महागल्यामुळे शेतकऱ्यांना दूध व्यवसाय परवडणारा राहिला नाही.

- दीपक काटे, संस्थापक शिवधर्म फाउंडेशन, बारामती

...या मागण्या आहेत

- ३४ रुपये दर देण्याच्या शासन निर्णयाच्या आदेशाची पालन न करणाऱ्या खासगी दूध संघावर कठोर कारवाई करण्यात यावी.

- शेतकऱ्यांबद्दल आत्मीयता असणारे मंत्री या विभागास मिळावेत.

- मंत्र्यांनी स्वतःची कामे न करता शेतकऱ्यांसाठी आत्मीयता ठेवून त्यांच्याकरता महत्त्वाची कामे करावीत.

- शेतकऱ्याच्या दुधाला ३४ रुपये हमीभाव मिळाला नाही, तर उपोषण करणार.