Khopoli News : खालापूर तालुक्यातील काही भागात शेतीसाठी १५ डिसेंबरपर्यंत पाताळगंगा उपसिंचन कालव्याला पाणी येत सोडण्यात येते, परंतु माजगाव, आंबिवली, वारद, पौध तसेच परिसरातील अनेक आदिवासी वाड्यांत पाणीपुरवठा करणारे कालवे २०१७ पासून कोरडे पडले आहेत.
कालव्याची दुरुस्ती झाली की पाणी सोडले जाईल, असे आश्‍वासन दरवर्षी लोकप्रतिनिधींकडून देण्यात येत असले तरी सहा-सात वर्षांपासून सिंचनासाठी पाणी न मिळाल्‍याने शेतकऱ्यांमधून नाराजी व्यक्त होत आहे.
पाताळगंगा नदीवरील कालव्याची दुरवस्था झाली आहे. ठिकठिकाणी गळती लागल्‍याने काही भागांत कालव्याचे पाणी पोहोचतच नाही. परिसरात शेकडो हेक्टर भात शेती आहे. बहुतांश शेतकरी भातशेती व भाजीपाला लागवड करतात,
मात्र कालव्याचे पाणी नियोजित वेळेवर पोहचत नसल्यामुळे उन्हाळी भातशेती करता येत नाही. तसेच फळभाज्‍यांच्या लागवडीतही अडचणी येतात. कालवा नादुरुस्‍त झाल्‍याने अनेक भागात सिंचनासाठी पाणीच मिळत नाही. त्‍यामुळे परिसरातील शेतकऱ्यांनी भातलागवडीकडेही पाठ फिरवल्‍याचे दिसून येत आहे.
खरसुंडी बंधाऱ्यातून पाणी कालव्याला येते, मात्र पाताळगंगा उपसिंचन कालव्याची दुरवस्था झाली आहे. त्‍याची दुरुस्तीचा प्रस्ताव पाच महिन्यांपूर्वी वरिष्‍ठ कार्यालयात पाठवला आहे.भारत गुंटूरकर, उपअभियंता पाटबंधारे विभाग
कालव्याला पाणी उपलब्ध होत नसल्याने पाच-सहा वर्षांपासून भात लागवड करता येत नाही. शिवाय गुरांच्या पिण्याच्या पाण्याचा प्रश्न निर्माण होतो. सोबत विहिरीला पाणी राहत नाही, कालव्याची देखभाल-दुरुस्तीचा प्रस्ताव असाच प्रलंबित राहिल्यास परिसरातील शेतकऱ्यांना दुबार भातशेती करणे अवघड होईल.रवी काठावले, शेतकरी माजगाव
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.