Palghar News : पालघर किनारपट्टी भागातील शेतीमध्ये वेगवेगळे नावीन्यपूर्ण प्रयोग करून जिल्ह्यातील शेतकरी समृद्धीकडे वाटचाल करत आहे. डहाणू तालुक्यातील चिंचणी पाचमार्ग येथील शेतकऱ्याने तब्बल नऊ एकर क्षेत्रावर ऑर्किड फुलशेतीची लागवड करून जिल्ह्यातील शेतकऱ्यांसमोर एक आदर्श निर्माण केला आहे.
रामचंद्र सावे कुटुंबाची सुमारे चार एकर पारंपरिक शेती होती. पावसाळी मुख्यत: भातपीक, तर रब्बी हंगामात मिरची लागवड केली जात असे. समुद्रकिनारी पट्ट्यात असणारी शेती खाऱ्या पाण्यामुळे उत्पादन वाढीसाठी मर्यादा होत्या.
बाजारात ऑर्किड प्रकारातील रंगबेरंगी फुलांना चांगली मागणी असल्याचे रामचंद्र सावे यांना समजले. नवनवीन प्रयोग करत राहण्याची इच्छा आणि ओढीमुळे त्यांनी ऑर्किड उत्पादन करण्याचे ठरविले. थायलंडमध्ये जाऊन त्यांनी ऑर्किड फुलशेतीचा अभ्यास केला.
अर्धा एकरापासून सुरू केलेल्या पॉलीहाउसमधील ऑर्किड लागवड आज नऊ एकरपर्यंत वाढली आहे. सोनिया रेड सोनिया व्हाइट या प्रकारच्या फुलांची लागवड करण्यात आली. सावे यांच्याकडील लागवड पाहून अन्य शेतकऱ्यांनी ऑर्किड लागवड केली असून, आज हे क्षेत्र सुमारे २० एकरपर्यंत वाढले आहे.
ऑर्किड फुलांच्या लागवडीसाठी मोठा खर्च येत असला तरी एकदा रोपांची लागवड केली की, किमान सहा ते सात वर्षे उत्पन्न मिळते. सध्या ऑर्किड फुलाच्या एका फांदीला २० ते २५ रुपये मिळतात. एक एकर क्षेत्रात ऑर्किड लागवडीसाठी अंदाजे एक कोटीचा खर्च येतो. कमी क्षेत्रात उत्पन्नाचे साधन निर्माण करणे, काळाची गरज असल्याने तरुणांनी या क्षेत्राकडे वळावे, असे आवाहन रामचंद्र सावे करतात.
लागवडीसाठी नारळाच्या काथ्याचा वापर
एक एकराच्या पॉलीहाउसमध्ये साधारणपणे ४० हजार रोपे बसतात. या रोपांसाठी नारळाच्या काथ्याचा वापर केला आहे. लागवडीपासून सात ते नऊ महिन्यांनंतर फुलांचे उत्पादन व्हायला सुरुवात होते. एकाच वेळी सर्व रोपांना फुले येत नसली तरी प्रथम वर्षी प्रति रोप तीन ते चार, दुसऱ्या वर्षी पाच ते सात, तिसऱ्या वर्षी आठ ते दहा फुले मिळतात. त्यांची विक्री मुंबई, दादर, पुणे या ठिकाणी केली जाते.
संगणकीकृत प्रणालीचा वापर
शेती संगणीकृत असून, पाणी, खते सर्व ऑटोमायजेशनद्वारे दिले जाते. केवळ दोन ते तीन मजुरांच्या साह्याने पॉलीहाउसचे व्यवस्थापन केले जाते. एक एकराचे पॉलीहाउस उभारणीसाठीचा खर्च वजा होऊन निव्वळ उत्पन्न येण्यासाठी दोन वर्षांचा वेळ द्यावा लागतो. तिसऱ्या वर्षापासून चांगले उत्पन्न मिळू शकते.
निसर्गाच्या बदलत्या चक्रामुळे शेतीचे गणित दिवसेंदिवस बिघडत चालले आहे. त्यामुळे विद्यार्थ्यांसह जिल्ह्यातील शेतकऱ्यांनी शाश्वत उत्पादन देणाऱ्या पिकाकडे व्यवसायाच्या दृष्टिकोनातून पाहावे आणि उत्पन्नाचा नवीन स्रोत निर्माण करावा.- सोनालिका पाटील, प्राचार्य, कृषी तंत्र विद्यालय
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.