Alibaug News : परतीच्या पावसाने शेतकऱ्यांची चिंता वाढली आहे. जिल्ह्यातील सुधागड-पाली, माणगाव, खालापूर येथे मुसळधार पावसामुळे नदी-नाल्यांच्या पातळीत वाढ झाली आहे. पाणथळ जागेतील खाचरात पाणी वाढल्याने भाताच्या लोंब्‍या आडवी होण्याची भीती शेतकऱ्यांना आहे.

तयार होत आलेल्या भातपिकाला पाण्याची फारशी गरज नसते, मात्र शेतात पाणी भरल्‍याने कापणी लांबण्याची तसेच कीड प्रादुर्भावाची शक्‍यता आहे. यंदा समाधानकारक पडलेल्या पावसाने भातशेती चांगलीच तरारली आहे; मात्र परतीच्या पावसाने शेतकऱ्यांची चिंता वाढली आहे.

घाटमाथ्यावर झालेल्‍या अतिवृष्‍टीमुळे नद्यांच्या पात्रातही वाढ झाली आहे. भातशेतीत पाणी साचल्‍याने हातातोंडाशी आलेले भातपीक वाया जाण्याची भीती आहे. सध्या शेतकऱ्यांकडून भातपीक कापण्याची तयारी सुरू आहे. यासाठी कापणीच्या साहित्याची जुळवाजुळव सुरू आहे. परंतु पावसाने कापणीचे नियोजन बिघडले आहे.

कापणीच्या वेळी शेतात पाणी राहिल्‍यास कडपा व्यवस्थित ठेवता येत नाही. ओंब्या पाण्यात भिजल्याने दाणा खराब होतो, त्याचबरोबर चिखलात कापणी करण्यासाठी जादा मनुष्यबळ लागते.

 भाजीविक्रेत्‍यांना फटका

काही दिवस विश्रांती घेतलेल्या पावसाने बुधवारी दमदार हजेरी लावली; अवघ्‍या काही तासांत पावसाने रौद्ररूप धारण केल्‍याने नागरिकांची त्रेधातिरपीट उडाली. पावसामुळे छोटे-मोठे व्यावसायिक तसेच भाजीविक्रेत्‍यांना पावसाचा मोठा फटका बसला. पावसाची तीव्रता इतकी होती की, नदी, नाले काही तासांत दुथडी भरून वाहू लागले.