Sindhudurg News : जिल्ह्याच्या काही भागांत गुरुवारी (ता. १२) विजांच्या कडकडाटासह जोरदार पाऊस झाला. वैभववाडी तालुक्यातील काही गावांत वाऱ्यांसह पाऊस झाला. यामुळे भातपीक जमिनीवर कोसळून मोठे नुकसान झाले आहे.

कापणी वेळेत झाली नाही तर मोठे नुकसान होणार आहे. जिल्ह्यात गेले दोन-तीन दिवस विजांच्या कडकडाटासह पाऊस पडत आहे. सायंकाळच्या वेळेत हा पाऊस पडत आहे. त्यामुळे भातपिकांचे नुकसान सुरू झाले आहे.

तीन दिवसांपूर्वी सावंतवाडी तालुक्यातील दाणोली परिसराला झोडपून काढल्यानंतर गुरुवारी सायंकाळी वैभववाडी तालुक्यातील खांबाळे, आर्चिणे, सडुरे, शिराळे, कुर्ली या गावांत वाऱ्यांसह जोरदार पाऊस झाला.

पूर्व पट्ट्यातील गावांत तासभर मुसळधार पाऊस झाला. त्यामुळे नद्यांच्या पाणीपातळीत देखील वाढ झाली. याशिवाय इतर गावांत देखील मध्यम सरी कोसळल्या.

दरम्यान, पावसामुळे परिपक्व झालेली भातपिके जमिनीवर कोसळली आहेत. त्यामुळे भातपिकांची लोंबी तुटून पडण्याची भीती आहे. जमिनीवर कलंडलेल्या भातपिकांची कापणी लवकर न झाल्यास मोठे नुकसान होण्याची शक्यता आहे.

एकीकडे भातपीक झपाट्याने परिपक्व होत आहे. तर दुसरीकडे पाऊस थांबण्याची कोणतीही चिन्हे दिसत नाहीत. त्यामुळे शेतकरी हतबल आहेत.