Vashi News : थंडीची चाहूल लागताच बाजारात संत्र्यांच्या हंगामाला जोरदार सुरुवात झाली आहे. सध्या वाशीतील एपीएमसीत नागपूर आणि नगर जिल्ह्यातून मोठ्या प्रमाणात संत्री दाखल झाली आहेत. त्यामुळे दरही काहीसा घसरला असून चवीला आंबट-गोड असणारी संत्री सर्वसामान्य नागरिकांच्या आवाक्यात आली आहेत.

मंगळवारी (ता. २९) वाशीतील एपीएमसीत ५,१६० क्विंटल संत्र्यांची बंपर आवक झाली आहे. त्यामुळे भाव काहीसे कमी झाले आहेत. आठवडाभरापूर्वी ३० ते ७० रुपये किलोने विकली जाणारी संत्री सध्या ४० ते ५० रुपये किलोने विकली जात आहेत. तर आकाराने लहान संत्र्यांचा भाव २० ते ३० रुपये प्रतिकिलो आहे.

अवकाळीचाही फटका

यंदा नागपूर आणि नगर जिल्ह्यात संत्र्यांचे उत्पादन चांगले झाले असले तरी अवकाळी पावसाचा फटका याला बसल्याचे उत्पादक शेतकरी सांगत आहेत. त्यामुळे संत्री बाजारात येण्यास काहीसा उशीर लागत असल्याचे शेतकऱ्यांनी सांगितले.

अवकाळी पावसामुळे काही शेतकऱ्यांनी संत्र्यांची वेळेआधीच तोडणी केल्याने संत्री पूर्णपणे तयार झालेली नाहीत. त्यामुळे बाजारात येईपर्यंत बरीचशी खराब झाल्याने फेकून दिली जात आहेत. यामुळे शेतकऱ्यांचे मोठे नुकसान होत आहे. मात्र, तरीही येत्या काळात आवक वाढून चांगला भाव मिळेल, असा विश्‍वास शेतकऱ्यांकडून वर्तविला जात आहे.