Amaravati News : निधीअभावी गेल्या अनेक वर्षांपासून रखडलेल्या सिट्रस इस्टेटच्या कामासाठी साडेसहा कोटी रुपयांची उपलब्धता करण्यात आली आहे. परिणामी या कामाला गती येण्याची शक्‍यता वर्तविली जात असून यातील पाच कोटी रुपये मुदतठेवी (फिक्‍स्ड डिपॉझिट) अंतर्गंत ठेवण्यात आले आहेत. यावरील व्याजाच्या आधारे सिट्रस इस्टेटचे कामकाज चालविण्यात येणार आहे.

पंजाबच्या धर्तीवर संत्रा उत्पादकांना लागवड ते विपणन अशा सर्वच टप्प्यात संत्रा बागायतदारांना मार्गदर्शन मिळावे याकरिता सिट्रस इस्टेटची संकल्पना मांडण्यात आली आहे. तीन वर्षांपूर्वी याची घोषणा करण्यात आली. परंतु ‘ना निधी, ना नियोजन’ यामुळे सिट्रस इस्टेट केवळ कागदावरच अस्तित्वात असल्याची स्थिती आहे. या संदर्भात ‘ॲग्रोवन’मधून सातत्याने लिखाण करण्यात आले.

त्याची दखल घेत आयुक्‍तालयाच्या स्तरावरून राज्यभरात सिट्रस इस्टेटकरिता निधीची उपलब्धता केली गेली. चांदूरबाजार (अमरावती) येथे कृषी विभागाच्या टीएसएफ प्रक्षेत्रावर सिट्रस इस्टेटचे काम प्रस्तावीत आहे. परंतु निधीच नसल्याने हे काम पुढे सरकत नव्हते. आमदार बच्चू कडू यांनी या संदर्भात पाठपुरावा केल्यानंतर नुकताच साडेसहा कोटी रुपये उपलब्ध करून देण्यात आले आहेत. यातील पाच कोटी रुपये बॅंकेत मुदत ठेवीअंतर्गंत जमा करण्यात आले आहेत.

या र‍कमेवरील व्याजातून या ठिकाणी सेवा देणाऱ्या कंत्राटी कर्मचाऱ्यांचे पगार करणे त्यासोबत इतर सुविधा पुरविण्यावर भर दिला जाणार आहे. शेतकऱ्यांना लागवड साहित्य (रोप) पुरवठा तसेच इतर तांत्रिक सेवा सशुल्क मिळणार आहेत. या पैशाचा उपयोग देखील सोयीसुविधा बळकटीकरणासाठी केला जाणार असल्याचे कृषी विभागाकडून सांगण्यात आले.

संत्रा बागेतील कीडरोगाचा प्रादुर्भाव व त्याच्या नियंत्रणासाठी झाडांच्या विविध घटकांचे पृथ्थकरण करावे लागणार आहे. त्यासाठी आधुनिक सयंत्राची उपलब्धता असलेल्या प्रयोगशाळांची उभारणी देखील केली जाणार आहे.