Pune News : उन्हाच्या झळा तीव्र होत असल्याने धरणांतील पाण्याची मागणी वेगाने वाढत आहे. जिल्ह्यातील अनेक धरणांनी तळ गाठला असून मार्च महिन्याच्या अखेरीस दहा धरणे कोरडी पडली आहेत. सध्या धरणांत अवघा २७ टक्के पाणीसाठा शिल्लक आहे. त्यामुळे येत्या काळात पाण्याची भीषण टंचाई भासण्याची शक्यता आहे.

पुणे जिल्ह्यात लहान मोठी एकूण २६ धरणे आहेत. या धरणातील पाण्याचा वापर शेतीसाठी तसेच पुणे आणि पिंपरी-चिंचवड येथील नागरिकांना होतो. गेल्या महिन्यापासून अति उष्णतेमुळे धरणातील पाण्याची मागणी होती.

त्यामुळे धरणातील पाण्याची पाणीपातळी झपाट्याने कमी झाली आहे. सध्या जिल्ह्यातील धरणांत अवघा ५४.५२ टीएमसी म्हणजेच २७ टक्के पाणीसाठा उपलब्ध आहे. गेल्या वर्षी याच काळात या धरणांत एकूण ९१.२५ टीएमसी एवढा पाणीसाठा उपलब्ध होता.

गेल्या वर्षीच्या तुलनेत चालू वर्षी पाणीसाठ्यात मोठी घट झाल्याचे दिसून येते. तर टेमघर, कासारसाई, वडिवळे, शेटफळ, नाझरे, चिल्हेवाडी, माणिकडोह, येडगाव, विसापूर, उजनी, वडज ही धरणे कोरडी पडली असून यामध्ये मृत पाणीसाठा उपलब्ध आहे. तर नाझरे धरणांत मृत साठाही संपुष्टात आला आहे.

उन्हाळी हंगामामुळे शेतकऱ्यांकडून मागणी वाढली आहे. यामुळे खडकवासला, चासकमान, वीर, पिंपळगाव जोगे, येडगाव, डिंभे, घोड या धरणांतून डाव्या आणि उजव्या अशा कालव्याला पाणी सोडण्यात आले आहे. त्यामुळे शेतकऱ्यांच्या पिण्याच्या पाण्याचा व शेतीच्या पाण्याचा प्रश्न काही प्रमाणात सुटण्यास मदत झाली आहे.

सध्या मुठा खोऱ्यातील चार धरणांत अवघा १२.७४ टीएमसी म्हणजेच ४३ टक्के पाणीसाठा उपलब्ध आहे. नीरा खोऱ्यातील धरणांमध्ये १७.६७ टीएमसी म्हणजेच ३६ टक्के पाणीसाठा आहे. कुकडी खोऱ्यातील धरणांमध्ये ९.७९ टीएमसी म्हणजेच २० टक्के पाणीसाठा आहे.