Jalna News : यावर्षी कमी झालेल्या पावसामुळे तालुका परिसरात रब्बीची पेरणी घटली आहे. मागील वर्षी ३१ हजार ९९४ हेक्टरवर रब्बीची पेरणी झाली होती. परंतु, यावर्षी फक्त ३ हजार ६१९ हेक्टरवर ज्वारी आणि हरभरा या दोनच पिकांची पेरणी झाली आहे.

परतुर तालुक्यामध्ये यावर्षी खरीप हंगामाच्या सुरवातीपासूनच अत्यल्प पाऊस झाला. तर खरीप हंगामातील सोयाबीन पिकाला अत्यल्प उतारा आला.

शेतकऱ्यांना उत्पादन खर्च निघणेही अवघड झाले आहे. कपाशीची लागवड यावर्षी खरीप हंगामात मोठ्या प्रमाणावर झाली होती. पाण्याची उपलब्धता असलेल्या बागायती क्षेत्रावर कापूस चांगल्या प्रमाणावर फुटला आहे. मात्र, जिरायती क्षेत्रावरील कापूस पहिल्या वेचणीतच संपणार आहे.

परतीचा पाऊस देखील पडला नसल्याने यावर्षी निम्न दुधना प्रकल्पात २५ टक्केच पाणीसाठा शिल्लक आहे. यावर्षी असलेल्या अत्यल्प पावसामुळे यावर्षी तालुक्यात आजपर्यंत ३ हजार ६१९ हेक्टरवर शेतकऱ्यांनी रब्बीची पेरणी केली असून, यामध्ये ज्वारी आणि हरभरा या दोन पिकांचा समावेश आहे.यंदा पाऊस कमी असल्याने 50 टक्केच्या आत रब्बी पिकांची पेरणी होईल, असा अंदाज कृषि विभाग व्यक्त करत आहे.

ऊस उपलब्धतेची समस्या

यावर्षी विंधन विहिरीला पाणीसाठा अत्यल्प आहे. शिवाय निम्न दुधना धरणात केवळ २५ टक्केच पाणीसाठा असल्याने नविन उसाची लागवड यावर्षी होणार नाही. असलेला ऊस यंदा कमी होणार असल्याचे चित्र आहे. पुढील वर्षी साखर कारखानदारांसमोर ऊस उपलब्धतेची समस्या राहण्याची शक्यता आहे.

पेरणी झालेले क्षेत्र

रब्बी ज्वारी २३०० हेक्टर

रब्बी हरभरा १३१९ हेक्टर

मागील वर्षी झालेली पेरणी

(हेक्टरमध्ये)

ज्वारी १०४५४

हरभरा १३४३०