Pune News : तालुक्याच्या पूर्व भागात सोमवारी (ता. ६) सायंकाळी व रात्री पडलेल्या अवकाळी पावसाने पिकांचे मोठ्या प्रमाणात नुकसान झाले आहे. नव्याने लागवड केलेला कांदा व काढणी (Onion harvesting) केलेल्या कांद्याचे, तसेच काढणीला आलेल्या गव्हाचे नुकसान (Wheat Loss) झाल्याने शेतकऱ्यांना मोठा आर्थिक फटका बसू शकतो.

तसेच मोहोर गळाल्याने आंब्याचेही नुकसान होणार आहे. वीटभट्टी व्यावसायिकांच्या मातीच्या कच्चा विटा पावसात भिजून फुटल्याने मोठे नुकसान झाले आहे.

धामणी, जारकरवाडी, वैदवाडी, अवसरी बुद्रुक, मेंगडेवाडी, पारगाव, खडकवाडी, पोंदेवाडी, खडकवाडी, पोंदेवाडी, लाखणगाव, देवगाव, काठापूर बुद्रुक परिसरात सोमवारी (ता.६) सायंकाळी व रात्री विजांच्या गडगडाटासह अवकाळी पावसाने हजेरी लावली. काही गावांत गाराही पडल्या.

या पावसाने काढणीला आलेल्या ज्वारी, तसेच गव्हाच्या पिकाचे नुकसान झाले आहे. या वर्षी कांद्याला बाजारभाव नाही, त्यातच काही ठिकाणी शेतात काढून ठेवलेला कांदा भिजला.

अचानक आलेल्या पावसाने कांदा झाकण्यासाठी शेतकऱ्यांची धांदल उडाली. तसेच शेतात असलेल्या कांदा पिकावर रोगाचा प्रादुर्भाव होण्याचा धोका वाढला आहे, अशी माहिती टाव्हरेवाडीचे सरपंच व आंबेगाव तालुका सरपंच परिषदेचे अध्यक्ष उत्तम टाव्हरे यांनी दिली.

सोमवारी अचानक आलेल्या अवकाळी पावसाने वीटभट्टी व्यावसायिकांची धांदल उडाली काहींनी प्लॅस्टिक कागदाने कच्चा विटा झाकण्याचा प्रयत्न केला, तरीही काही प्रमाणात मातीच्या कच्चा विटा पावसात भिजून फुटून गेल्याने मोठे नुकसान झाल्याची माहिती वैदवाडी येथील वीटभट्टी व्यावसायिक ज्ञानेश्‍वर दरेकर यांनी दिली.