Pune News: जुन्नर तालुक्यातील आळेफाटा येथील उपबाजारात मंगळवारी (दि. ५) कांद्याच्या ११ हजार ३८९ पिशव्यांची आवक झाली. एक नंबर गोळा कांद्यास प्रति क्विंटलला १६०० रुपये बाजारभाव मिळाला, अशी माहिती जुन्नर कृषी उत्पन्न बाजार समितीचे सभापती संजय काळे, उपसभापती प्रीतम काळे, सचिव रूपेश कवडे व व्यवस्थापक दीपक म्हस्करे यांनी दिली.

आळेफाटा येथे एक नंबर कांद्यास दहा किलोस १४० ते १६० रुपये बाजारभाव मिळाला. तर दोन नंबर कांद्यास १३० ते १४० बाजारभाव मिळाला‌‌. तीन नंबर गोल्टी कांद्यास १०० ते १२० रुपये बाजारभाव मिळाला. तर चार नंबर बदला, चिंगळी कांद्यास दहा किलोस ३० ते ८० रुपये बाजारभाव मिळाला.

दरम्यान कांद्याला उत्पादन खर्चाएवढाही बाजारभाव मिळत नसल्याने उत्पादक शेतकरी अडचणीत सापडला आहे. सध्या कांद्याला ८ ते १५ रुपये प्रति किलो दर मिळत असून यामधून उत्पादन खर्चही वसूल होत नाही. इंधनाचे भरमसाट वाढलेले दर, मजुरी, मशागत या खर्चामध्ये मोठ्या प्रमाणात वाढ झाली आहे.

रासायनिक खते तसेच कीटकनाशकाच्या किमती मोठ्या प्रमाणात वाढल्याने उत्पादन खर्चात गेल्या वर्षीच्या तुलनेने दुप्पट वाढ झाली आहे. सध्या मिळत असलेला बाजारभाव हा अतिशय कमी असून यातून उत्पादन खर्चही वसूल होत नसल्याने कांदा चाळीत साठवून ठेवला होता. परंतु साठवलेला कांदा देखील सडू लागल्याने उत्पादक शेतकरी मिळेल त्या बाजारभावात कांदा विकू लागला आहे.

जुन्नर तालुक्यात ऊस या पिकानंतर सर्वात जास्त कांदा पीक घेतले जाते. कांदा पिकवताना सर्वसाधारणपणे प्रति किलो १२ रुपये कांद्यास उत्पादन खर्च येत असतो. चांगला बाजारभाव मिळेल या आशेने मोठ्या प्रमाणात शेतकऱ्यांनी कांद्याची लागवड केली होती. परंतु योग्य असा बाजारभाव मिळत नसल्याने कांदा उत्पादक शेतकरी अडचणीत आलेला दिसून येत आहे.