Pune News : ‘मुख्यमंत्री माझी लाडकी बहीण’ योजनेबाबत पुणे जिल्हा परिषदेमार्फत अर्ज भरून घेतले जात आहेत. आत्तापर्यंत एकूण १ लाख ३४ हजार ४९८ अर्ज प्राप्त झाले आहेत. यामध्ये ऑफलाइन पद्धतीने ८९ हजार ९७ अर्ज आले आहेत, अशी माहिती मुख्य कार्यकारी अधिकारी संतोष पाटील यांनी दिली आहे.

आतापर्यंत जिल्ह्यात ऑफलाइन पद्धतीने ८९ हजार ९७ अर्ज, तर ऑनलाइन पद्धतीने ४५ हजार ४०१ असे एकूण १ लाख ३४ हजार ४९८ अर्ज प्राप्त झाले आहेत. यात ऑनलाइन व ऑफलाइन असे दोन्ही मिळून आंबेगाव तालुक्यात १६ हजार २७६ अर्ज प्राप्त झाले आहेत.

बारामतीत १७ हजार ५०९, भोर ४ हजार ३७६, दौंड ७ हजार १०८, इंदापूर १० हजार ८४, हवेली १० हजार ६६५, जुन्नर १२ हजार ८४३, खेड १० हजार ३४, मावळ १३ हजार १८३, मुळशी ५ हजार ४५६, पुरंदर ९ हजार ७१८, शिरूरला १५ हजार ८४२ वेल्हा तालुक्यात १ हजार ४३४ अर्ज प्राप्त झाले आहेत.

गावातील अथवा त्या-त्या वॉर्डातील सर्व पात्र लाभार्थ्यांचे ऑफलाइन पद्धतीने हार्ड कॉपी अर्ज अंगणवाडी सेविकांकडे जमा करण्यात येत आहेत. सर्व नोंद झालेल्या लाभार्थींच्या नावांचे प्रत्येक शनिवारी चावडी वाचन केले जाईल.

त्यात आक्षेप असल्यास पात्र, अपात्रतेबाबत गाव पातळीवरच खातरजमा करून तालुकास्तरावर समितीद्वारे अंतिम मान्यता दिली जाणार आहे. जिल्ह्यातील सर्व पात्र लाभार्थींना लाभ मिळावा, तसेच कोणतीही पात्र महिला योजनेच्या लाभापासून वंचित राहू नये याची प्रशासनामार्फत दक्षता घेण्यात येत आहे, असेही पाटील यांनी सांगितले.