Ahilyanagar News: मराठा समाजातील तरुणांना रोजगार मिळावा यासाठी अण्णासाहेब पाटील आर्थिक मागास विकास महामंडळाच्या योजनांतून कर्जाच्या व्याज परताव्याचा लाभ दिला जातो. आतापर्यंत राज्यात दीड लाख लाभार्थ्यांना योजनेतून लाभ मिळाला आहे. सर्वाधिक लाभार्थी अहिल्यानगर जिल्ह्यात आहेत. राज्यात आतापर्यंत १,२२२ कोटी रुपयांचा व्याज परतावा देण्यात आला आहे.

मराठा समाजातील तरुणांना रोजगार, व्यवसायासाठी आर्थिक मदत व्हावी या उद्देशाने अण्णासाहेब पाटील आर्थिक मागास विकास महामंडळाकडून व्यवसाय, उद्योगासाठी कर्ज घेतले तर त्याचे व्याज महामंडळाकडून दिले जाते. विशेष करून वाहनांसह शेतीपूरक व्यवसायासाठी कर्ज आणि त्यावरील व्याज परतावा दिला जात आहे.

महामंडळाच्या योजनांद्वारे राज्यातील १ लाख ५० हजार लाभार्थ्यांना उद्योगासाठी १२,६०० कोटी रुपयांचे कर्ज मंजूर करण्यात आले असून, १,२२२ कोटी रुपयांचा व्याज परतावा देण्यात आला आहे. या बाबत श्री. पाटील यांनी अहिल्यानगरला नुकतीच बैठक घेतली

उपजिल्हाधिकारी अतुल चोरमारे, जिल्हा अग्रणी बँक अधिकारी आशिष नवले, महामंडळाच्या विभागीय समन्वयक पल्लवी मोरे, जिल्हा कौशल्य विकास, रोजगार व उद्योजकता मार्गदर्शक केंद्राचे सहायक आयुक्त रविकुमार पंतम, जिल्हा समन्वयक अमोल बोठे, कौशल्य विकास अधिकारी शुभदा पाठक उपस्थित होते.