Nanded News: विधानसभा निवडणुकीत महायुती सरकारला ‘लाडकी बहीण’ योजना फायदेशीर ठरली. महायुती सरकारकडून लाडक्या बहिणींना १५०० रुपये दिले जातात. आता योजनेतील ‘लाडक्या बहिणीं’ना स्वावलंबी बनण्यासाठी ४० हजार रुपयांचे कर्ज दिले जाणार आहे. याबाबत सरकार विचारविनिमय करत आहे, अशी माहिती उपमुख्यमंत्री अजित पवार यांनी दिली.

नांदेड जिल्ह्यातील मुखेड तालुक्यातील चव्हाणवाडी येथे राष्ट्रवादी काँग्रेसच्या वतीने रविवारी (ता. ११) आयोजित एका कार्यक्रमात अजित पवार यांनी ही माहिती दिली. उपमुख्यमंत्री पवार म्हणाले, की राज्यातील ‘लाडक्या बहिणीं’ना दरमहा दीड हजार रुपये शासनाच्या वतीने दिले जातात.

यासाठी ४५ हजार कोटी रुपये खर्च होतात. एखाद्या महिन्यात थोडासा विलंब झाला तरी विरोधक अफवा पसरवतात. बहिणींनी या अफवांवर विश्वास ठेवू नये. खऱ्या लाभार्थ्यांना या योजनेचा लाभ मिळत राहणार आणि योजना बंद होणार नाही. उलट आम्ही नवीन प्रस्ताव आणला आहे. काही बँका पुढे आल्या आहेत.

नांदेड जिल्ह्यातील बँकेसमवेत मी बोलणार आहे. काही सहकारी बँका चांगल्या आहेत. दरमहा दीड हजार रुपये भगिनींना दिले जातात. त्याऐवजी उद्योग, व्यवसायासाठी ४० हजार रुपयांपर्यंत भांडवल उपलब्ध करून द्यायचे व कर्जाचा हप्ता योजनेतून वळता केला जाईल. ५० हजारांचे भांडवल झाले तर, बहिणी स्वत:चा व्यवसाय करू शकतील, कुटुंब उभे करू शकतात. असे ते म्हणाले.