Parbhani News : महात्मा जोतीराव फुले आणि भारतरत्न डॉ. बाबासाहेब आंबेडकर यांच्या संयुक्त जयंतीनिमित्त वसंतराव नाईक मराठवाडा कृषी विद्यापीठातील विद्यापीठ ग्रंथालयात शुक्रवारी (ता. ११) सकाळी ६ ते रात्री १२ वाजेपर्यंत सलग १८ तास अभ्यास उपक्रमाचे आयोजन करण्यात आले होते. या उपक्रमात विद्यार्थी मोठ्या संख्येने सहभागी झाले होते.

कुलगुरू डॉ. इंद्र मणी मिश्रा अध्यक्षस्थानी होते. शिक्षण संचालक डॉ. भगवान आसेवार, सहयोगी अधिष्ठाता डॉ. सय्यद इस्माईल, डॉ. गजेंद्र लोंढे, डॉ. विश्‍वनाथ खंदारे, विद्यार्थी कल्याण अधिकारी डॉ. राजेश कदम, डॉ. हिराकांत काळबांडे, डॉ. रामप्रसाद खंदारे, डॉ. मिलिंद सोनकांबळे, डॉ. संतोष कदम आदींसह विविध विभाग प्रमुख उपस्थित होते.

डॉ. इंद्र मणी म्हणाले, की भारताच्या संविधानाचे जनक भारतरत्न डॉ. बाबासाहेब आंबेडकर यांचे जीवन हे अखिल मानवजातीसाठी प्रेरणादायी आहे.

त्यांच्या जीवनातील संघर्ष आणि ज्ञानार्जनाची तळमळ ही विद्यार्थ्यांनी अंगीकारावी. सलग अभ्यास हा उपक्रम केवळ एक दिवसापुरता मर्यादित न ठेवता विद्यार्थ्यांनी आयुष्यभर अभ्यासाची सवय ठेवावी असेही त्यांनी नमूद केले.