Chhatarapati Sambhajinagar News : जिल्ह्यातील अंजना पळशी मध्यम प्रकल्पात पाणी असतानाही सिंचनासाठी ते मिळत नाही. याला गेट व कालव्याची नादुरुस्ती कारणीभूत आहे. दोन्ही दुरुस्त्यांच्या खर्चासाठी वर्षभरापूर्वी शासनाने प्रशासकीय मान्यता दिली. आताच्या घडीला प्रकल्प कोरडा असल्याने तत्काळ ही दुरुस्ती करावी, अशी मागणी शेतकऱ्यांमधून होत आहे.

माहितीनुसार, अंजना नदीवर सिल्लोड तालुक्यातील पिशोर गावच्या पश्चिमेस सिल्लोड-कन्नड रोडवर अर्धा किलोमीटर अंतरावर अंजना पळशी मध्यम प्रकल्प १९९८ मध्ये पूर्ण करण्यात आला. प्रकल्पास डावा व उजवा असे दोन मुख्य कालवे प्रत्येकी ११ किलोमीटर लांबीचे आहेत. २०३० हेक्टर सिंचन या प्रकल्पातून होणे अपेक्षित आहे.

प्रकल्पाचा पूर्ण पाणीसाठा १५.५५ दलघमी इतका असून त्यापैकी नक्त साठा १३.७४ दलघमी तर मृतसाठा हा १.८१ दलघमी इतका आहे. प्रकल्पाच्या सांडव्याची लांबी २०८ मीटर इतकी आहे. प्रकल्पाचा उजवा व डावा हे मुख्य कालवे व त्यावरील वितरण प्रणालीच्या बांधकामास २५ वर्षे लोटली आहेत.

ही सर्व बांधकामे दगडी आहेत. पाणी वितरण प्रणाली ही काही ठिकाणी काळ्या मातीमधून आहे. तसेच टेकडी, डोंगरमाथ्याच्या उतारा जवळून वितरण प्रणाली व त्यावरील बांधकामाची बहुतांश ठिकाणी मोडतोड झाली आहे. कालव्यातून पाण्याचा झिरपा मोठ्या प्रमाणात होत आहे. त्यामुळे कालवे वितरण प्रणालीची पाणी वाहन क्षमता मोठ्या प्रमाणात घटली आहे. मुख्य डावा व उजवा कालवा, प्रकल्पातील गेट दुरुस्तीची मागणी केली.

 ४ कोटी ८३ लाखांच्या खर्चास मान्यता

आता शासनाने गेट व कालवा दुरुस्तीसाठी ४ कोटी ८३ लाख ४२ हजार २०० रुपयांच्या खर्चास प्रशासकीय मान्यता दिली आहे. तत्काळ गेट व कालवा दुरुस्तीचे काम सुरू करण्याची मागणी नाचनवेलचे उपसरपंच रावसाहेब शिंदे, जवखेडा बु. चे सरपंच प्रवीण हराळ, मोहाडीचे अनिल चोंधे, आमदाबादचे तंटामुक्ती समिती अध्यक्ष कैलास खंडागळे आदींनी केली.