Kolhapur News : गेल्या हंगामातील उसाला प्रती टन चारशे रुपये मिळावेत या शेतकरी संघटनांच्या मागणीबाबत चर्चा करण्यासाठी जिल्हाधिकारी राहुल रेखावर यांनी गुरुवारी (ता. १२) बोलावलेली बैठक निष्फळ ठरली. स्वाभिमानी शेतकरी संघटनेचे मागील हंगामातील गाळप झालेल्या उसाला उर्वरित चारशे रुपये द्यावेत, या मागणीसाठी आंदोलन सुरू केले आहे.

यासह अन्य शेतकरी संघटना ही याबाबतची मागणी करत आहेत. या पार्श्‍वभूमीवर जिल्हाधिकारी राहुल रेखावार यांनी गुरुवारी साखर कारखानदार व स्वाभिमानी शेतकरी संघटनेसह इतर शेतकरी संघटनेच्या पदाधिकाऱ्यांना बैठकीस निमंत्रित केले होते.

यात तोडगा निघतो का, याकडे संपूर्ण जिल्ह्याचे लक्ष लागले होते परंतु कोणताही तोडगा निघाला नाही. संघटनांच्या भूमिकेवर कारखानदारांनी कोणतीही ठोस भूमिका वा निर्णय घेतला नाही.

राजू शेट्टी यांनी आपली बाजू मांडली. ते म्हणाले, की जिल्ह्यातील बहुतांश साखर कारखान्यांनी मागील गळीत हंगामातील उसाला ‘एफआरपी’प्रमाणे दर शेतकऱ्यांना दिला आहे. मात्र साखरेचा दर चांगला असल्याने साखर कारखानदारांनी किमान ४०० रुपये प्रतिटन शेतकऱ्यांना उर्वरित रक्कम द्यावी, अशी आमची मागणी आहे.

यावर जिल्हाधिकारी रेखावर यांनी कारखानदारांमधील कोणाला बाजू मांडायची आहे का, याबाबत विचारणा केली. परंतु कोणत्याही कारखाना प्रतिनिधींनी ४०० रुपये जादा दर देण्यावर भाष्य करण्याचे टाळले.

गुरूदत्त कारखान्याचे अध्यक्ष व कार्यकारी संचालक माधवराव घाटगे म्हणाले, की यंदा साखरेला चांगला भाव आहे हे आम्हाला मान्य आहे. परंतु साखर कारखानदारांसमोर काही अडचणी आहेत त्या आम्हाला सोडवाव्या लागत आहेत. सरकारच्या नियमानुसार ‘एफआरपी’ तीन तुकड्यात द्यायचा कायदा असूनही आम्ही एकरकमी ‘एफआरपी’ देत आहोत.

कारखानदार आणि शेतकरी संघटना यांनी मांडलेल्या भूमिकेवर जिल्हाधिकारी रेखावार यांनी मी दोन्ही बाजूच्या भूमिका सरकारकडे मांडणार आहे. याबाबत पुढील बैठकीत काहीतरी यातून मार्ग निघेल, असे सांगितले.

ज्या कारखान्यांनी मागील गळीत हंगामातील ऑनलाईन पद्धतीने माहिती दिली नाही त्या कारखानदारांवर १५ दिवसांनंतर कारवाई करण्याचे आदेश साखर सहसंचालकांना देण्यात आले.

बैठकीत दत्त कारखान्याचे अध्यक्ष गणपतराव पाटील, आंदोलन अंकुशचे धनाजी चुडमुंगे, जैव इंधन शेतकरी संघटनेचे शामराव देसाई, आदींसह विविध कारखान्याचे पदाधिकारी व शेतकरी संघटनांचे पदाधिकारी उपस्थित होते.