Kolhapur News : दर्जेदार कोल्हापुरी गूळ निर्मितीसाठी भेसळमुक्त गूळ तयार करणे काळाची गरज आहे, असे प्रतिपादन विभागीय कृषी संशोधन कोल्हापूरचे सहयोगी संशोधन संचालक डॉ. अशोक कुमार पिसाळ यांनी केले.

महात्मा फुले कृषी विद्यापीठ, राहुरीअंतर्गत प्रादेशिक ऊस आणि गूळ संशोधन केंद्र कोल्हापूर येथे कार्यान्वित असलेल्या अखिल भारतीय समन्वयीत काढणी पश्चात अभियांत्रिकी व तंत्रज्ञान प्रकल्प यांच्या वतीने सुधारित ऊस लागवड आणि गूळ निर्मितीचे आधुनिक तंत्रज्ञान या विषयावर कोलोली (ता. पन्हाळा) येथे आयोजित केलेल्या एकदिवसीय ऊस पीक कार्यशाळेत डॉ. पिसाळ बोलत होते. सरपंच पवित्रा कांबळे, उपसरपंच प्रकाश पाटील यांची प्रमुख उपस्थिती होती.

उसाच्या लागवडीसाठी तसेच गूळ निर्मितीसाठी, संशोधन केंद्राने विकसित केलेल्या तंत्रज्ञानाचा वापर करण्याचे आवाहन कृषीविद्यावेत्ता डॉ. विद्यासागर गेडाम यांनी केले.

डॉ. गोविंद येनगे, डॉ. योगेश बन, डॉ. अभयकुमार बागडे यांनी मार्गदर्शन केले. आभार वरिष्ठ संशोधन अधिकारी डॉ. बापूराव गायकवाड यांनी मानले. कृष्णात गुरव, दीपक पाटील, कौस्तुभ नकाते, सौरभ देशमुख आणि नितीन जाधव यांनी परिश्रम घेतले.