Parbhani News: खरीप २०२५ मध्ये जून अखेरपर्यंत परभणी जिल्ह्यातील बँकांनी ५१ हजार १६ शेतकऱ्यांना ४६७ कोटी ९१ लाख  ६४ हजार रुपये (३०.९६टक्के) पीककर्ज वाटप केले आहे. त्यात ३ हजार ५०१ शेतकऱ्यांना ५१ कोटी ६१ लाख ६ हजार रुपये नवीन पीककर्ज वाटप आहे.

४७ हजार ५१५ शेतकऱ्यांनी ४१६ कोटी ३० लाख ५८ हजार रुपये कर्जाचे नूतनीकरण केले आहे.परभणी जिल्ह्यातील बँकांना यंदाच्या खरिपात १ हजार ५११ कोटी ६० लाख रुपये पीककर्ज वाटपाचे  उद्दिष्ट देण्यात आले आहे.

३० जून अखेर राष्ट्रीयीकृत (व्यापारी) बँकांनी १० हजार १७३ शेतकऱ्यांना १३१ कोटी ३९ लाख रुपये,महाराष्ट्र ग्रामीण बँकेने १५ हजार ७११ शेतकऱ्यांना १७९ कोटी ६७ लाख रुपये,जिल्हा  मध्यवर्ती  सहकारी बँकेने २४ हजार ४१५  शेतकऱ्यांना १४० कोटी ४४ लाख रुपये पीककर्ज वाटप केले.

२०२४मध्ये ३० जून अखेरपर्यंत ५८ हजार १४४ शेतकऱ्यांना ४४३ कोटी ५८ लाख रुपये (३०.१६टक्के) पीककर्ज वाटप झाले होते.पीककर्ज वाटपात जिल्हा बँक आघाडीवर असून त्यानंतर महाराष्ट्र ग्रामीण बँक,राष्ट्रीयीकृत बँका,खासगी बँका असा क्रम आहे.