Pune News: पुणे कृषी उत्पन्न बाजार समितीमधील गेल्या अनेक वर्षांपासून रखडलेले आणि सुमारे १०० कोटी रुपयांपेक्षा अधिक खर्च करूनदेखील अपूर्ण असलेल्या फूल बाजाराच्या इमारतीमध्ये नातेवाईकांना घुसविण्याचा प्रकार समोर येत आहे.

याला १९९० पासून प्रतीक्षा यादीतील आणि प्रत्यक्षात व्यापार करणाऱ्या फुलांच्या आडत्यांनी विरोध केला असून, प्रतिक्षायादी डावलून बेकायदा नव्याने वितरित केलेले परवाने रद्द करण्याची मागणी फूलबाजार आडते असोसिएशनचे अध्यक्ष अप्पा गायकवाड यांनी प्रशासनाकडे केली आहे.

पुणे बाजार समितीमधील नव्याने बांधण्यात येणाऱ्या फूलबाजाराची इमारत बरेच दिवस रेंगाळली आहे. यासाठी प्रशासनाकडून विविध कारणे दिली जात आहेत. यामध्ये कोरोनाकाळ, इमारतीमधील बदल, अतिरिक्त खोदाई प्रकरणी जिल्हाधिकारी कार्यालयाच्या गौणखनिज विभागाने केलेली कारवाई आदी विविध कारणांनी इमारत बांधकाम रेंगाळत गेले आणि खर्चदेखील दुपटीने सव्वाशे कोटी रुपयांपर्यंत वाढत गेला.

या नव्याने बांधण्यात येणाऱ्या बाजारात १९९० पर्यंत परंपरेने व्यवसाय करणारे आडतदार, नंतरची प्रतीक्षा यादी यांना प्राधान्यक्रम देण्यात येणार होता. मात्र आता संचालक मंडळाने आपल्या नातेवाईकांना फूलबाजारात गाळे मिळावेत, यासाठी परवाने दिले असल्याचा आरोप फूलबाजार आडते असोसिएशनचे अध्यक्ष अप्पा गायकवाड यांनी केला आहे. याबाबत त्यांनी प्रशासनाकडे दाद मागितली आहे.

या वेळी गायकवाड यांनी प्रतीक्षायादी डावलून नव्याने देण्यात आलेले परवाने रद्द करावेत. १९९० मधील पारंपरिक परवानाधारक आडत्यांना आणि नंतर प्रतीक्षा यादीतील आडत्यांना गाळे वितरीत करावेत, अशी मागणी केली आहे.

गाळ्यांचे ऑनलाइन लिलाव

या प्रकारानंतर बाजार समिती प्रशासनाने सर्व गाळ्यांचे ऑनलाइन लिलाव करून, सुमारे २०० कोटी रुपयांचा महसूल उभारणीचे उद्दिष्ट ठेवले असल्याचे सचिव डॉ. राजाराम धोंडकर यांनी सांगितले.