Maize Production: राज्यात यंदा खरिपात मका क्षेत्र वाढीचा अंदाज

Ahilyanagar News: गेल्या वर्षी बाजरी, कापसाला पुरेसा दर मिळाला नसल्याचा फटका यंदा खरिपात बसण्याची शक्यता जाणकारांकडून व्यक्त होत आहे. यंदा आतापर्यंतच्या खरीप पेरणीनुसार मक्याचे क्षेत्र वाढीचा अंदाज आहे. गत वर्षीपेक्षा यंदा २ लाख ७८ हजार ३४५ हेक्टर क्षेत्रावर अधिक पेरा झाला आहे. कापूस लागवड, बाजरीच्या पेरणीचे क्षेत्र गतवर्षीपेक्षा आतापर्यंत तरी यंदा कमीच आहे.

राज्यात खरिपाचे १४४ लाख ३६ हजार ५४ हेक्टर सरासरी क्षेत्र असून, आतापर्यंत (७ जुलै) १०७ लाख ९६ हजार ३९५ हेक्टरवर पेरणी झाली आहे. यंदा लवकर झालेल्या पावसामुळे मूग, उडदाचे क्षेत्र काहीसे वाढले आहे. मुगाचे ३,०२,४५९ सरासरी क्षेत्र असून, यंदा १,७८,२४४ हेक्टरवर पेरणी झाली.

गेल्या वर्षी १,९४,८२७ हेक्टरवर पेरणी झाली होती. उडदाचे ३,५९,३२९ हेक्टर सरासरी क्षेत्र असून यंदा २,९८,०९९ हेक्टरवर पेरणी झाली. गेल्या वर्षी २,९२,१३४५ हेक्टरवर पेरणी झाली होती. मक्याचे ९,३३,८१९ हेक्टर सरासरी क्षेत्र असून, यंदा आतापर्यंत ११,२३,९४९ हेक्टरवर पेरणी झाली असून, गेल्या वर्षी आतापर्यंत ८ लाख ४५ हजार ६०४ हेक्टरवर पेरणी झाली होती.

राज्यात यंदा मक्याचा २ लाख ७८ हजार ३४५ हेक्टर क्षेत्रावर गतवर्षीपेक्षा अधिक पेरा झाला आहे. तर, यंदा तुरीची कमी गत वर्षीपेक्षा पेरणी झाली आहे. तुरीचे १२,७७,१२३ हेक्टर सरासरी क्षेत्र असून ९,८४,३९६ हेक्टरवर पेरणी झाली आहे. गतवर्षी ९,९४,४०५ हेक्टरवर पेरणी झाली होती. सोयाबीनचीही यंदा गतवर्षीपेक्षा काहीशी कमी पेरणी झाली आहे. सोयाबीनचे ४७,२१,४८८ हेक्टर सरासरी क्षेत्र असून आतापर्यंत राज्यात ४० लाख ६० हजार ४१४ हेक्टरवर पेरणी झाली आहे.

गतवर्षी ४३,१९,४६६ हेक्टरवर पेरणी झाली होती. आतापर्यंतचा विचार केला तर गतवर्षीपेक्षा यंदा सोयाबीनची पेरणी कमी झाली आहे. बाजरी, कापसाचे क्षेत्र यंदा कमी राहण्याचा अंदाज आहे. बाजरीची यंदा गतवर्षीपेक्षा कमी पेरणी झाली आहे. बाजरीचे ४,८१,६८६ हेक्टर सरासरी क्षेत्र असून, आतापर्यंत २ लाख ४५ हजार १४० हेक्टरवर पेरणी झाली आहे. गतवर्षी ३ लाख ४५ हजार ४६१ हेक्टरवर पेरणी झाली होती.

कापसाचे ४२,४७,२१२ हेक्टर सरासरी क्षेत्र असून आतापर्यंत ३३ लाख ६९ हजार ७३० हेक्टरवर लागवड झाली आहे. गतवर्षी ३६ लाख ७४ हजार ३९३ हेक्टरवर लागवड झाली होती. आतापर्यंतचा विचार करता कापसाचे गतवर्षीपेक्षा यंदा तीन लाख ४ हजार हेक्टर क्षेत्र कमी आहे, तर आतापर्यत झालेल्या पेरणीचा कल पाहता मक्याचे क्षेत्र अधिक वाढणार असे दिसते आहे.

पावसाच्या दडीमुळे पेरण्या कमीच

राज्यातील काही भागांचा अपवाद वगळता बहुतांश भागात गेल्या काही दिवसांपासून पाऊस गायब आहे. अधूनमधून सरी येत असल्या तरी त्याचा पेरणीसाठी फारसा फायदा होताना दिसत नाही. आतापर्यंत राज्यात सरासरीच्या ७४ टक्के पेरणी झाली आहे. गतवर्षी या काळात ७६ टक्के पेरणी झाली होती. मे मधील पावसाने शेतीची कामे लवकर उरकली. जूनच्या सुरुवातीला चांगला पाऊस झाल्याने पेरण्यांना वेग आला. मात्र काही दिवसांपासून पावसाने दडी मारल्याने पेरण्यांना अडथळे येत असून, पेरणी झालेल्या भागांतही पावसाची आशा लागल्याचे शेतकरी सांगत आहेत.