Yavatmal News : मुख्यमंत्री सौर कृषीवाहिनी योजने अंतर्गत जिल्ह्यातील तीन मेगावॉट क्षमतेचा पहिला सौर प्रकल्प कळंब तालुक्यातील सावरगाव (परसोडी) येथे मुख्य अभियंता ज्ञानेश कुलकर्णी यांच्या हस्ते कार्यान्वित करण्यात आला. या प्रकल्पामुळे परिसरातील १०४६ शेतकऱ्यांना दिवसा वीज पुरवठा मिळणार आहे.

मुख्यमंत्री सौर कृषीवाहिनी योजना २.० अंतर्गत राज्यात १६ हजार मेगावॉट क्षमतेचे सौर ऊर्जा प्रकल्प उभारण्यात येत आहे. महावितरणचे व्यवस्थापकीय संचालक लोकेश चंद्र यांच्या मार्गदर्शनाखाली मुख्यमंत्री सौर कृषी वाहिनी योजना २.० ला गती देण्यात आली आहे. अमरावती परिमंडळात सुरू करण्यात आलेला हा पहिला सौर प्रकल्प आहे.

सावरगाव सौरप्रकल्प महावितरणच्या उपकेंद्रापासून सुमारे दोन किलोमीटर अंतरावर असलेल्या १५ एकर शासकीय जमिनीवर उभारण्यात आला आहे. अवादा या विकास कामामार्फत पूर्ण करण्यात आलेला हा प्रकल्प महावितरणच्या ३३ केव्ही सावरगाव (परसोडी) उपकेंद्राशी जोडण्यात आला आहे.

त्यामुळे ३३ केव्ही सावरगाव (परसोडी) उपकेंद्रातून निघणाऱ्या तीन कृषी वीज वाहिनीवरील २५ गावातील एक हजार ४६ शेतकऱ्यांना दिवसा वीजपुरवठा मिळणार आहे.

प्रकल्पाचे काम जलद गतीने पूर्ण करण्यासाठी अधीक्षक अभियंता प्रवीण दरोली, कार्यकारी अभियंता पुरुषोत्तम चव्हाण, शशांक पोंक्षे, उपकार्यकारी अभियंता मांगीलाल राठोड, सागर डेकाटे व चाचणी विभागाने महत्त्वाची भूमिका पार पाडली. सौर ऊर्जेचा वापर करून स्थानिक पातळीवर वीज निर्माण करायची व त्याच्या आधारे कृषी पंपांना दिवसा वीज पुरवठा करायचा, अशी ही योजना आहे.