Pune News : पुणे कृषी उत्पन्न बाजार समितीमधील बाजार शुल्क (सेस) चोरीचे रॅकेट सक्रिय असल्याचे समोर आले आहे. प्रवेशद्वारावरील आवक आणि गाळ्यावरील आवक यात तफावत असल्याचे सिद्ध झाले आहे. मात्र या प्रकरणी संबंधित अडत्यांना केवळ समज देऊन सोडून देण्यात आले आहे.

बाजार समितीच्या फळविभागात सध्या परदेशी फळांबरोबरच देशांतर्गत विविध फळांची आवक मोठ्या प्रमाणावर सुरू आहे. यामध्ये सफरचंद, चेरी, प्लम, अवाकॅडो, संत्रा, ड्रॅगन फ्रूट, द्राक्ष, लिची आदी फळांचा समावेश आहे. या फळांची आवक झाल्यावर वाहनांची आणि वजनाची नोंद प्रवेशद्वार होते.

मात्र प्रत्यक्ष झालेली आवक आणि तोलणारांची नोंद यांच्यात तफावत जाणवत असल्याने बाजार समिती प्रशासनाने सुरक्षारक्षकांद्वारे प्रवेशद्वारावर झालेली नोंद आणि प्रत्यक्ष गाळ्यावर झालेली नोंद यांची माहिती संकलन आणि पडताळणी करण्यासाठी कार्यप्रणाली सुरू केली. या कार्यप्रणालीमध्ये २ ते १० टनांपर्यंत तफावत असल्याचे माहिती संकलन करणाऱ्या कर्मचाऱ्याने सांगितले. यामुळे सेस चोरी होत असल्याचे पुन्हा एकदा सिद्ध झाले आहे.

दरम्यान, गेल्या महिनाभरापासून ही पडताळणी सुरू असल्याचे फळविभाग प्रमुख प्रशांत गोते यांनी सांगितले. ते म्हणाले, ‘‘बाजार समितीचे उत्पन्न वाढीसाठी सेस गळती रोखण्याचे प्रयत्न सुरू आहेत. यासाठी फळ विभागात होणारी आवक आणि प्रत्यक्ष गाळ्यावर होणारी नोंद याची माहिती संकलन सुरू आहे.

यामध्ये काही अडते संशयास्पद सापडले आहेत. त्यांना समज देऊन, त्यांच्या आवकेची पडताळणी सुरू आहे. पडताळणी झाल्यावर दोषी आढळल्यास संबधितांना नोटिसा देऊन, खुलासा मागविला जाणार आहे. समाधानकारक खुलासा न आल्यास त्यांच्यावर कायद्यानुसार दंडात्मक कारवाई केली जाणार आहे.’’

एकाच्या नावावर गाडी, विक्री दुसऱ्याच्या नावावर

सेस चोरी करण्यासाठी काही अडत्यांनी दुसऱ्याच्या नावावर फळांची आवक मागविली आणि विक्री तिसऱ्याच्या गाळ्यावर केल्याचा प्रकार समोर आला आहे. मात्र याबाबत ज्याच्या गाळयावर विक्री झाली त्याला काहीच माहिती नसल्याचे देखील समोर आल्याने सेस चोरीचा सावळागोंधळ सुरू असल्याचे समजते.