Pune News | मराठा आरक्षणासाठी मनोज जरांगे पाटील मुंबईत २६ जानेवारीपासून आमरण उपोषण करणार आहेत. त्यासाठी ते मुंबईकडे निघणार आहेत. त्याआधी त्यांनी शनिवारी (ता. २० रोजी) अंतरवलीतून माध्यमांशी संवाद साधला. यावेळी त्यांनी, सरकारवर जोरदार टीका करताना, मराठ्यांना आता घरी न राहता २६ जानेवारी रोजीला मुंबईत पुर्ण ताकदीनीशी या असे आवाहन केले आहे.

यावेळी मनोज जरांगे यांनी, मराठा आरक्षणाची लढाई निर्णायक स्थितीत आल्याचे सांगताना, आरक्षण हे मिळालेच पाहिजे, आता मागे हटायचं नाही असे म्हटलं आहे. तसेच यावेळी त्यांनी सरकारवर जोरदार निशाना साधताना, अनेक माऊलींच्या कपाळावर कुंकू राहिलं नाही. हे फक्त या निर्दयी सरकारमुळे झाल्याची टीका त्यांनी केली आहे.

तसेच आता या सरकारला नीट केल्याशिवाय मराठ्यांना शांत बसून चालणार नाही. गेल्या ७ महिन्यापासून समाजाने सरकारला वेळ दिला. मात्र सरकार समाजाच्या मुलांना न्याय देत नाही. त्यामुळे आरक्षण घेतल्या शिवाय राहणार नाही. आता मी इथून एकटा निघालो असलो तरी मुंबईमध्ये करोडो मराठा बांधव येतील असा इशारा त्यांनी दिला आहे.

गुलाल लागणारच

अंतरवाली सराटी येथून मनोज जरांगे पाटील यांनी मुंबईकडे कूच केली आहे. यावेळी आपण गाव सोडत असल्यानेच डोळ्यात पाणी आल्याचे म्हणताना, आता प्राण गेले तरी माघार नाही. मराठ्यांच्या अंगावर आरक्षणाचा गुलाल लागणारच असा विश्वास त्यांनी व्यक्त केला आहे.

सरकारला झोप कशी येते?

गेल्या अनेक वर्षांपासून मराठा समाजाची आरक्षणासाठी मागणी आहे. त्यासाठी आक्रोश मोर्चे निघाले. शेकडो मराठे शहीद झाले. घरातील कर्ता पुरुष गेला. अनेक माता-भगिनींचे कुंकू पुसले गेले. मात्र सरकारने आरक्षण दिले नाही. आपली मुले आत्महत्या करत असतानाही या सरकारला झोप कशी येते? हे इतके निर्दयी आणि नालायक कसे असू शकते? असा सवाल त्यांनी केला आहे.