Chhatrapati Sambhajinagar : पशुसंवर्धनाला चालना दिल्यास त्यातून प्रक्रिया उद्योग, विक्री व्यवस्था, वैरण विकास, पशुखाद्य निर्मिती अशा अनेक क्षेत्रांत व्यवसाय व उद्योगाच्या संधी निर्माण होतात.

त्यामुळे पशुसंवर्धनातून आपण उद्योजकता विकास घडवून लहान लहान उद्योजक घडवू शकतो. त्यातून अनेकांना रोजगाराची संधीही आपण देऊ शकतो, असे प्रतिपादन जिल्हाधिकारी दिलीप स्वामी यांनी केले.

पशुसंवर्धन पंधरवड्यानिमित्त मंगळवारी (ता. ६) राष्ट्रीय पशुधन अभियानांतर्गत पशुपालकांसाठी कार्यशाळेचे आयोजन करण्यात आले होते. मौलाना अबुल कलाम आझाद सभागृहात आयोजित या कार्यशाळेस जिल्हाभरातील पशुपालक उपस्थित होते.

कार्यक्रमास प्रादेशिक पशुसंवर्धन सहआयुक्त डॉ. प्रशांत चौधरी, जिल्हा पशुसंवर्धन उपायुक्त डॉ. प्रदीप झोड, जिल्हा पशुसंवर्धन अधिकारी (जि.प.) डॉ. सुरेखा माने, सहायक आयुक्त डॉ. रमण इंगळे, तज्ज्ञ मार्गदर्शक डॉ. विकास नरवडे, जिल्हा अग्रणी बॅंक व्यवस्थापक मंगेश केदार आदी उपस्थित होते.

जिल्हाधिकारी स्वामी म्हणाले, की पशुपालनाकडे केवळ शेतीला पूरक व्यवसाय म्हणून पाहणे उचित नाही. तर पशुपालन व संवर्धनात शेतकऱ्यांच्या जीवनात आमूलाग्र बदल घडविण्याची क्षमता आहे.

पशुसंवर्धनाला आधुनिक तंत्रज्ञान आणि व्यावसायिक मूल्यांची जोड दिल्यास त्यातून उद्योजकता विकासाला चालना देता येईल, आपल्या जिल्ह्याला दैनंदिन जितके दूध लागते त्यापैकी निम्मेही इथे उत्पादन होत नाही. त्यासाठी शेजारील जिल्ह्यातून आपल्याला गरज भागवावी लागते. अंडी, मांस याबाबतही वेगळी स्थिती नाही. स्वाभाविकपणे दुग्ध उत्पादन, अंडी, कुक्कुटपालन, शेळी पालन या व्यवसायाला आपल्या जिल्ह्यात खूप वाव आहे.