Sindhudurg News : जिल्ह्यात २४ ते २६ नोव्हेंबर या कालावधीत पाऊस पडण्याचा अंदाज हवामान विभागाने दिल्यामुळे जिल्ह्यातील आंबा, काजूसह भातपीक उत्पादक शेतकरी धास्तावले आहेत. या संभाव्य पावसामुळे अंतिम टप्प्यातील भातपीक कापणीवर देखील परिणाम होणार आहे.

जिल्ह्यातील भातपीक कापणी अंतिम टप्प्यात आहे. जिल्ह्यातील किनारपट्टीच्या तालुक्यांमध्ये आंब्याला पालवी, मोहोर फुटण्याची प्रक्रिया सुरू झाली असून जिल्ह्याच्या उर्वरित भागात काजू पिकाला देखील पालवी येऊ लागली आहे. तर काही भागांत मोहोरदेखील येऊ लागला आहे.

अशा परिस्थितीत आता जिल्ह्यावर पुन्हा एकदा पावसाचे सावट निर्माण झाले आहे. हवामान विभागाने २४ ते २६ नोव्हेंबर या तीन दिवसांत जिल्ह्यात विजांच्या कडकडाटासह हलक्या ते मध्यम स्वरूपाच्या पावसाचा अंदाज दिला आहे. या पावसाचा मोठा परिणाम अंतिम टप्प्यात असलेल्या भातपीक कापणीवर होणार आहे.

लांबलेली भातपीक कापणी पावसामुळे पुन्हा एकदा रखडण्याची शक्यता आहे. आंबा, काजू या फळपिकांवर देखील परिणाम होण्याची शक्यता आहे. पावसामुळे आंबा, काजूवर कीडरोगांचा प्रादुर्भाव वाढण्याची शक्यता असते. पालवी आलेल्या झाडांवर टी मॉस्कीटोचा प्रादुर्भाव होण्याची भीती शेतकऱ्यांमध्ये आहे.

जिल्ह्यातील बहुतांश आंबा, काजू बागायतदारांनी गेल्या काही दिवसांपासून बागांमधून मशागतीची कामे सुरू केली आहेत. काही शेतकऱ्यांची कीटकनाशकांची फवारणीदेखील झाली आहे. त्यामुळे पाऊस पडला किंवा ढगाळ वातावरण निर्माण झाले तर पुन्हा फवारणी करावी लागणार आहे.