Manchar News : मंचर येथील कृषी उत्पन्न बाजार समितीच्या आवारात गुरुवारी (ता. ७) विक्रीसाठी आलेल्या जुन्या कांद्याला प्रतीकिलोला ७० रुपये दर मिळाला. गेल्या दोन वर्षातील हा उच्चांकी बाजारभाव मिळाल्याने कांदा उत्पादक शेतकरी व अडत्यांचे चेहरे आनंदाने फुलले होते.

बाजारात तीन हजार ४६५ कांदा पिशव्यांची आवक झाली. प्रामुख्याने लाखणगाव, नारोडी, निरगुडसर, शिंगवे-पारगाव, देवगाव आदी ३० गावातील शेतकऱ्यांनी टेम्पो व ट्रॅक्टर-ट्रॉलीतून कांदा पिशव्या विक्रीसाठी आणल्या होत्या.

बंेगलुरू, हैदराबाद, सुरत व मुंबई भागांतील व्यापारी कांदा खरेदीसाठी येथे आले होते. विजय नामदेव सैद (रा. गिरवली), यशवंत शंकर हिंगे (रा. अवसरी बु.), मच्छिंद्र कोंडीभाऊ वळसे पाटील (रा. निरगुडसर) यांच्या जुन्या कांद्याला प्रती दहा किलोला ७०० रुपये बाजारभाव मिळाल्याचे अडतदार श्याम महादेव टाव्हरे, सुभाष गणपत निघोट यांनी जाहीर केले.

नव्या कांद्याला प्रती किलोला ५५ रुपये बाजारभाव मिळाला. नवीन कांदा ५०० पिशव्यांची बाजार आवारात आवक झाली.

कांद्याचे प्रती दहा किलो बाजारभाव पुढीलप्रमाणे : सुपर लॉट १ नंबर गोळा कांदा- ६५० ते ७००, सुपर गोळे कांदा १ नंबर- ६३० ते ६५०, सुपर मीडियम २ नंबर कांदा- ५५० ते ६३०, गोल्टी कांदा- ३५० ते ४५०, बदला कांदा २५० ते ४०० रुपये