Chh. Sambhajinagar News : मराठवाड्यातील आठही जिल्ह्यात सर्वसाधारण क्षेत्राच्या तुलनेत सुमारे २४ लाख ४० हजार १८०.२८ हेक्टरवर सोयाबीनची पेरणी तर सुमारे १२ लाख ४२ हजार हेक्टरवर कपाशीची लागवड झाली. आजवरचा अनुभव पाहता दोन्ही पिकांचा विचार करता सोयाबीनच्या नेहमीच्या तुलनेत किंचित तर कपाशीची बऱ्यापैकी घटच असल्याची स्थिती आहे.

मराठवाड्यात प्रामुख्याने लातूर,धाराशिव, बीड, परभणी, हिंगोली, नांदेड हे जिल्हे सोयाबीन उत्पादक जिल्हे म्हणून ओळखले जातात.तर छत्रपती संभाजीनगर,जालना, बीड,नांदेड,परभणी हे कपाशी उत्पादक जिल्हे म्हणून सर्वांना ज्ञात आहेत.

मराठवाड्यात उत्पादकता बरी आणि मिळणारे दर व ते वाढतील या आशेने शेतकऱ्यांनी गतवर्षीपर्यंत जिल्हानिहाय सर्वसाधारण क्षेत्राचा तुलनेत सोयाबीन पेरणीला दीड ते पावणेदोनपट जास्तच पेरणी करण्याला पसंती दिली होती.

परंतु दरवर्षीचा विचार करता यंदा तुलनेने सोयाबीनचे क्षेत्रातही घटच असल्याची स्थिती आहे. यंदा मराठवाड्यातील आठही जिल्ह्यात सोयाबीनचे सर्वसाधारण क्षेत्र २२ लाख ९८ हजार १५५ असताना प्रत्यक्षात २४ लाख ४० हजार १८० हेक्टर वरच सोयाबीनची पेरणी झाली. जी सर्वसाधारण क्षेत्राच्या तुलनेत टक्के इतकी आहे.

कपाशीचे मराठवाड्यात सर्वसाधारण क्षेत्र १४ लाख ७९ हजार ५३५ हेक्टर असताना प्रत्यक्षात ८३.९५ टक्के म्हणजे १२ लाख ४२ हजार ४३.८९ हेक्टर क्षेत्रावर कपाशीची लागवड झाली आहे.

कपाशी आणि सोयाबीन या दोन्ही पिकांना शेतकऱ्यांनी काही प्रमाणात मका या पिकाला पर्यायी पीक म्हणून स्वीकारले आहे. त्यामुळे यंदा पहिल्यांदाच मकाचे क्षेत्र सर्वसाधारण क्षेत्राच्या तुलनेत सुमारे १३७.२९ टक्के झाले असल्याची माहिती कृषी विभागाकडून देण्यात आली.