Ahilynagar News : राहुरीच्या महात्मा फुले कृषी विद्यापीठाच्या उद्यानविद्या विभागातील चिकू फळाच्या विक्रीतून यंदा आतापर्यंत चाळीस लाखांचा महसूल विद्यापीठास प्राप्त झाला आहे. मागील वर्षाच्या तुलनेत चिकूपासून मिळणाऱ्या महसुलात २३ टक्क्यांनी वाढ झाली आहे.

महात्मा फुले कृषी विद्यापीठाच्या उद्यान विद्या विभागाच्या कार्यक्षेत्रावर दहा हेक्टर क्षेत्रावर कालीपत्ती, क्रिकेट बॉल यासह इतर चिकुच्या फळझाडांची लागवड केलेली आहे. त्यात ९७२ उत्पादन देणारी फळ झाडे आहेत.

यंदा चिकूच्या झाडांवरील फळांची नुकतीच इ निविदा काढून विक्री केली. यंदा फळांची संध्या चांगली असल्याने ४० लाख रुपयांचे उत्पन्न मिळाले आहे. गतवर्षी ३१ लाख ५० हजार, दोन वर्षांपूर्वी २३ लाखांचे उत्पन्न मिळाले होते. यंदा मिळालेल्या उत्पन्नाचा विचार करता विद्यापीठाला गतवर्षीपेक्षा २३ टक्के उत्पन्न अधिक मिळाले आहे.

विद्यापीठातील चिकूची फळे गुणवत्ता तसेच चवीसाठी संपूर्ण महाराष्ट्रात प्रसिद्ध आहेत. महात्मा फुले कृषी विद्यापीठाचे कुलगुरू डॉ. पी. जी. पाटील, संशोधन संचालक डॉ. विठ्ठल शिर्के व उद्यानविद्या विभाग प्रमुख डॉ. भरत पाटील यांच्या मार्गदर्शनाखाली विद्यापीठातील चिकू फळबागांचे बारमाही व्यवस्थापन हे तांत्रिक व शास्त्रोक्त पद्धतीने केले जाते.

फळबागेचे योग्य व्यवस्थापन तसेच अधिक उत्पादनासाठी उद्यानविद्या प्रक्षेत्राचे प्रभारी अधिकारी डॉ. सचिन मगर, सहायक उद्यानविद्यावेत्ता तसेच कनिष्ठ संशोधन सहायक श्री. विजय पवार आणि श्री. राहुल पाटील, कृषी सहायक श्री. रमेश अनाप, सचिन शेळके, बाबासाहेब होडगर आंदीनी यासाठी यंदा चांगल्या पिकासाठी प्रयत्न केल्याचे सांगण्यात आले.