Pune News : महा-ई-सेवा केंद्रचालकाने तक्रारदाराकडून उत्पन्नाचा दाखला व डोमिसाईल सर्टिफिकेट काढून देण्यासाठी पाच हजार रुपयांची मागणी केली. लाचलुचपत प्रतिबंधक विभागाने सापळा रचून २ हजार ५०० रुपये स्वीकारताना केंद्रचालकाला ताब्यात घेतले.

दिघी येथील गुरुदेव दत्त महा-ई-सेवा केंद्रचालक १ संतोष वाळके व २ श्रीमती नंदा शिवरकर यांनी तक्रारदार यांच्याकडे आमची तहसील कार्यालयात ओळख असून, उत्पन्नाचा दाखला व डोमिसाईल सर्टिफिकेट काढून देण्यासाठी रुपये ५ हजार द्यावे लागतील, अशी मागणी केल्याची तक्रार तक्रारदार यांनी लाचलुचपत प्रतिबंधक विभागाकडे दिली होती.

तक्रारदार यांच्या तक्रारीची पडताळणी पंचासमक्ष केली असता, गुरुदेव दत्त महा-ई-सेवा केंद्रचालक संतोष वाळके व त्यांच्या महा-ई-सेवा केंद्रात काम करणारी नंदा शिवरकर यांनी तक्रारदार यांच्याकडे वरील काम करून देण्यासाठी शासकीय फी व्यतिरिक्त ५ हजार रुपयांच्या लाचेची मागणी करून नंदा शिवरकर हिने तक्रारदार यांच्याकडून २ हजार ५०० रुपये पंचासमक्ष स्वीकारले असता त्यांना ताब्यात घेण्यात आले.

त्यांच्याविरुद्ध दिघी पोलिस स्टेशन, पिंपरी-चिंचवड, पुणे येथे भ्रष्टाचार प्रतिबंध अधिनियम, १९८८ च्या कलमान्वये गुन्हा नोंद करण्याची प्रक्रिया सुरू आहे. पोलिस निरीक्षक विरनाथ माने तपास करीत आहेत. पोलिस अधीक्षक शिरीष सरदेशपांडे, अपर पोलिस अधीक्षक डॉ. शीतल जानवे यांच्या मार्गदर्शनाखाली पुणे लाचलुचपत प्रतिबंधक विभागाने ही कारवाई केली.