Palghar News : मनोर पट्ट्यातील गावांमध्ये सुमारे ७० ते ८० हेक्टर क्षेत्रावर ताग लागवड होते आहे. पीक कोवळे असताना गुरांना चारा आणि बियाणे तयार झाल्यावर साधारणतः ४० ते ४५ किलो दराने गुजरातमधील व्यापारी खरेदी करतात. त्यामुळे शेतकऱ्यांना उत्पन्नाचे साधन मिळत आहे.

पालघर जिल्ह्याच्या पूर्व भागासह वाडा, विक्रमगड, जव्हार आणि डहाणू तालुक्यातील पोखरण, बाडापोखरण, वासगाव या भागांमधील शेतकरी कमी खर्चात जास्त उत्पादन देणाऱ्या ताग लागवडीकडे वळला आहे.

सध्या हे पीक फुलोऱ्यात आले असून पिवळ्याधमक फुलांनी शेतात सोने उगवल्यासारखे भासत आहे. ताग हे जरी हिरवळीचे खत म्हणून प्रसिद्ध असले तरी येथील शेतकरी हे तागाच्या बियांची विक्री करून उत्पन्न घेत आहेत.

घरचेच बियाणे वापरत असल्याने कोणताही खर्च होत नाही. ऑक्टोबर, नोव्हेंबरदरम्यान लागवड केली जाते. भात पेरणीप्रमाणे तागाच्या बियाण्यांची पेरणी केली जाते. ताग पेरल्यानंतर वरून ट्रॅक्टर फिरवला जातो, त्यामुळे जमिनीमध्ये बियाणे व्यवस्थित मातीने झाकले जाते. बारा ते पंधरा दिवसांत जमिनीतील ओलाव्यावर ताग उगवून येतो.

थंडीच्या दिवसात दव पडत असल्याने जमिनीमध्ये आर्द्रता असते. त्यामुळे तागाच्या पिकाला सिंचनाची सुविधा लागत नाही. कीड व रोगाचा प्रादुर्भाव नसल्याने ताग लागवडही कमी खर्चात केली जात आहे.

वाल, मूग पिकांप्रमाणे तागाच्या बियाणाची पेरणी होते. खत, पाण्याचीही आवश्यकता भासत नाही. तागाच्या बियांपासून तेल तयार केले जाते. गुजरातमधील व्यापारी शेतकऱ्यांच्या घरी येऊन बी खरेदी करत असल्याने बाजारपेठ शोधण्याची गरज भासत नाही.

त्यामुळे बियाण्यांची विक्री ही स्थानिक पातळीवर होत असल्याने रब्बी हंगामात ताग लागवड होते. ताग शेतीतून प्रतिएकर पाच ते सहा क्विंटल उत्पादन (बी) मिळते. या बियांना चार ते पाच हजार प्रति क्विंटल दर मिळतो. कमी खर्चाचे व प्रतिएकरी हमखास उत्पादन देणारे हे पीक असल्याचे शेतकऱ्यांकडून सांगितले जाते.

ताग हे पीक नत्राची गरज स्वतः भागवत असल्याने बाहेरून नत्र देण्याची गरज भासत नाही. कमी कालावधीत जलद वाढ आणि भरपूर पाला देणारे पीक असल्याने वातावरणातील नत्र कमी कालावधीत घेण्याची क्षमता या पिकात आहे.