Parbhani News : जिल्ह्यात परवानाधारक १३७ सावकार असून २०२४-२५ या आर्थिक वर्षामध्ये त्यांनी २ हजार ३८७ व्यक्तींना ६ कोटी ९९ लाख ८६ हजार रुपये एवढे बिगर शेती कर्ज (व्यापारी कर्ज) वाटप केले आहे अशी माहिती सहकार विभागाच्या सूत्रांनी दिली.

जिल्हा उपनिबंधक सहकारी संस्था कार्यालयअंतर्गंत परभणी जिल्ह्यातील परवानाधारक सावकारांची संख्या १३७ आहे.सावकारी कर्जाच्या व्याज दर शेतीसाठी तारण कर्ज दरसाल दर शेकडा ९ टक्के दराने तर विनातारण कर्ज १२ टक्के आहेत.

बिगर शेती कर्जाचे व्याज दर तारण कर्जासाठी १५ टक्के तर बिगरतारण कर्जासाठी १८ टक्के आहेत. बँकांनी पीककर्जासाठी अडवणूक केल्यास अनेक शेतकऱ्यांना नाइलाजाने सावकारी कर्ज काढावे लागते.

परंतु मागील आर्थिक वर्षात (२०२४-२५) जिल्ह्यातील एकाही शेतकऱ्यांनी परवानाधारक सावकारांकडून शेतीविषयक कर्ज घेतल्याचे दिसत नाही. मागील वर्षी सावकरांनी जिल्ह्यातील २ हजार ३८७ व्यक्तींना ६ कोटी ९९ लाख ८६ हजार रुपये एवढे व्यापारी कर्ज वाटप केल्याचे सूत्रांनी सांगितले.