Kolhapur News: ‘‘शक्तिपीठ महामार्गाचा प्रश्न कसा सोडवायचा, याचा विचार मीदेखील करीत आहे. यावर शेतकरी नेते राजू शेट्टी आणि त्यांचे सहकारी यांची भूमिका काय आहे, ते समजून घ्यायचे आहे. सरकारचे जे म्हणणे आहे ते त्यांनी पटवून दिले तर त्यांची भूमिका समजून घेता येईल.

जोपर्यंत हा प्रकल्प आणि त्याच्या दोन्ही बाजू समोर येत नाहीत तोपर्यंत याबाबत अधिक भाष्य करता येणार नाही,’’ असे मत राष्ट्रवादी काँग्रेसचे अध्यक्ष खासदार शरद पवार यांनी शुक्रवारी (ता.२७) पत्रकार परिषदेत व्यक्त केले.

राज्य सरकारचा महत्त्वाकांक्षी प्रकल्प असलेल्या शक्तिपीठ महामार्गाच्या भूसंपादनास राज्य मंत्रिमंडळ बैठकीत मंजुरी देण्यात आली आहे. याविरोधात देखील राज्यात शेतकरी नेते आक्रमक झाले आहेत. या प्रश्नावर बोलताना श्री. पवार यांनी भूमिका स्पष्ट केली.

सध्या ऊस शेतीमध्ये चर्चेत असलेल्या कृत्रिम बुद्धिमत्तेविषयी (एआय) बोलताना श्री. पवार म्हणाले, की ही प्रणाली शेतकऱ्यांच्या दृष्टीने खूपच फायदेशीर आहे. या माध्यमातून शेतकऱ्यांच्या उत्पादन खर्चामध्ये ३० टक्क्यांपर्यंत बचत होऊन उत्पादन वाढ ही होऊ शकते. त्यामुळे ऊस शेतीत ही पद्धत शेतकऱ्यांना फायदेशीरच ठरेल.

काही शेतकरी नेत्यांकडून यापेक्षा अन्य चुकीच्या प्रथेला पायबंद करणारी प्रणाली राबवा असे सांगण्यात येत आहे. या प्रश्नावर बोलताना श्री, पवार म्हणाले, की ऊस शेतीत ‘एआय’ ही क्रांती आणणारी बाब आहे. त्याचा आणि अन्य चुकीच्या गोष्टीचा संबंध नाही.

हिंदी भाषा सक्तीवरून ते म्हणाले, ‘‘पहिली ते चौथीपर्यंत हिंदी भाषेची सक्ती करण्याची गरज नाही. मात्र पाचवीपासून पुढे हिंदी येणे गरजेचे आहे. इतर राज्यांच्या तुलनेत ५५ टक्के लोक हिंदी बोलतात. त्यामुळे हिंदीला दुर्लक्षित करून चालणार नाही. दोन्ही ठाकरेंना मुंबईत भेटणार आहे. महाराष्ट्राच्या हिताची जी भूमिका आहे ती घेतली जाईल,’’ असेही शरद पवारांनी सांगितले.

पण हिंदी-मराठीबाबत सर्वांनीच मोर्चात सहभागी व्हावे, असे म्हणता येणार नाही. शिवसेना ठाकरे गट-मनसे एकत्रित येतील काय हे सांगायला मी काय ज्योतिष नाही. सर्वजण एकत्रित येऊन चांगले होत असले तर वाईट वाटायची गरज नाही,’’ असेही श्री. पवार म्हणाले. या वेळी जिल्हाध्यक्ष व्ही. बी. पाटील, शहराध्यक्ष आर. के. पवार, समरजितसिंह घाटगे यांच्यासह पदाधिकारी, कार्यकर्ते उपस्थित होते.