नाशिक : स्थानिक पातळीवर शेतमजुरांची टंचाई (Agriculture Labour Shortage) मोठ्या प्रमाणावर जाणवत आहे. त्यामुळे मजुरीदरात भरमसाट वाढ झाली आहे. अधिक पैसे मोजूनही स्थानिक मजुरांना विनंत्या कराव्या लागतात. परिणामी, हंगामी कामांत अडचणी येऊन नियोजन कोलमडते. या पार्श्वभूमीवर आता शेतकऱ्यांना मध्य प्रदेश, गुजरातसह काही प्रमाणात उत्तरप्रदेश व बिहार राज्यातील शेतमजुरांची (Agriculture Labour) मोठी मदत होत आहे. तुलनेत कमी मजुरी व कामासाठी खात्रीशीर उपलब्धता असते. खरीप हंगामात जवळपास २० हजार मजुरांचे हात राबत असल्याचे समोर आले आहे. या शेतमजुरांमुळे मजूरटंचाईवर मात होण्यास मोठा हातभार लागत आहे.

खरीप व रब्बी अशा दोन्ही हंगामात शेतकरी बागायती पिके घेऊ लागले आहेत. मात्र एकाचवेळी कामे आल्याने कामासाठी स्थानिक मजूर वेळेवर उपलब्ध नसतात. मिळाले तर ते सांगतील तो रोजगार देऊनच कामे करावी लागतात. मजुरीत वाढ झाली पण तुलनेत उत्पन्न नसल्याने शेतकरी वैतागले आहेत. ही समस्या सोडविण्यासाठी परप्रांतीय मजूर मोठा आधारस्तंभ ठरत आहेत. हे मजूर प्रामुख्याने भूमिहीन तर काही अल्पभूधारक आहेत. पीकपद्धतीची कामे त्यांना नवीन होती. मात्र आता अनुभवातून ते शेतीकामांत कुशल झाले आहेत. खरीप हंगामात बाजरी, मका व सोयाबीन सोंगणी, कापूस वेचणी, खरीप कांदा लागवड तर रब्बीत उन्हाळ कांदा लागवड व काढणी, आले काढणी अशी कामे हे मजूर कुशलतेने करतात. यामध्ये गुजरात व मध्य प्रदेशमधील मजुरांची संख्या तुलनेने अधिक आहे.

जिल्ह्यातील शेती दृष्टिक्षेपात :

एकूण गावे...१,९६१

खरीप पिके घेणारी गावे...१,६७८

रब्बी पिके घेणारी गावे...२,८३

खातेदार...८,४४,५६५

परप्रांतीय मजुरांचा शेतकऱ्यांना असा आहे फायदा

- स्थानिक मजुरांच्या तुलनेत मजुरी कमी

- एका दिवशी ८ ते १० तासांपर्यंत काम

- शेतमालकाने सूचनेप्रमाणे काम