Shrirampur News : ‘‘जमीन, पाणी, बियाणे, खते, कीड व रोग या पंचतत्वांची माहिती असणे गरजेचे आहे. त्यानुसारच चांगले कांदा उत्पादन घेता येऊ शकते,’’ असे प्रतिपादन कृषी पर्यवेक्षक बाळासाहेब काकडे यांनी केले.

‘अॅग्रोवन’ व ‘कोरोमंडल इंटरनॅशनल लि.’ यांच्या संयुक्त विद्यमाने ‘कांदा व कापूस उत्पादन तंत्रज्ञान’ या विषयावर मक्तापूर (ता. नेवासे) येथील येथील हनुमान मंदिरात ‘अॅग्रो संवाद’ कार्यक्रम घेण्यात आला.

या वेळी ‘कोरोमंडल’चे सहयोगी उपाध्यक्ष जितेंद्र कोळपे, विभागीय कृषिवेत्ता डॉ. विनेश रेगे, विभागीय व्यवस्थापक समाधान बुधवत, कृषितज्ज्ञ प्रणव जाधव, विपणन अधिकारी विक्रम एकोंडे, सुमीत राठोड, रावसाहेब कांगुणे, ‘अॅग्रोवन’चे सहाय्यक व्यवस्थापक महेश बेले, सचिन तवले आदी उपस्थित होते.

काकडे म्हणाले, ‘‘कांदा लागवड करण्यापूर्वी माती परीक्षण करणे गरजेचे आहे. कांदा पिकात पाणी नियोजन (वापसा) करावे. लागवडी अगोदर रासायनिक खतांचे नियोजन करावे. लागवडीपूर्वी जमिनीचा सेंद्रिय कर्ब एक टक्का असावा. कांदा उत्पादनासाठी बीजोत्पादन महत्त्वाचे असते.

एकरी तीन लाख ९१ हजार ५०० रोपांची संख्या असावी. एका बाय एक जागेत नऊ रोपांची लागवड करावी. तणनाशकाचा योग्यवेळी वापर करावा. कीटकनाशक व बुरशीनाशक योग्यवेळी फवारावे. रोपवाटिकेची जागा दरवर्षी बदलावी. काढणीअगोदर बुरशीनाशकाची फवारणी करावी व नंतरच कांद्याची चाळीमध्ये साठवणूक करावी.’’

डॉ. रेगे म्हणाले, ‘‘कांदा व कापूस पिकाच्या एकात्मिक व्यवस्थापनात सेंद्रिय व रासायनिक खतांची गरज असते. शेणखत वापरून जमिनीचा सेंद्रिय कर्ब वाढतो. ‘थ्री जी’ संकल्पना वापरून शेतीतील उत्पादन वाढीसाठी कोरोमंडलने पर्याय म्हणून खते उपलब्ध केली आहेत.

कोरोमंडल ग्रो-स्मार्ट, ग्रो-प्लस व ग्रो-शक्ती वापरून पिकांची उत्पादकता वाढविता येईल. प्रामुख्याने ग्रोमोर नॅनो डीएपी फवारणीद्वारे द्यावे. स्फुरद, नत्र, पालाश यांसारखे घटक मिळण्यासाठी संयुक्त खते वापरली जातात. आजही प्रत्येक शेतकरी सुपर फॉस्फेट वापरतो. ते खत कोरोमंडलने १९०६ मध्ये बाजारात आणले आहे.’’ बेले यांनी प्रास्ताविक केले. प्रणव जाधव सूत्रसंचालन केले.