Jalgaon News : खानदेशात दादर ज्वारीची मळणी वेगात सुरू आहे. एकरी आठ ते १० क्विंटल एवढे उत्पादन येत आहे. मळणी मागील आठवड्यात सुरू झाली असून, या आठवड्यात या कार्यवाहीस वेग येईल, असे दिसत आहे.

कोरडवाहू दादर ज्वारीची पेरणी खानदेशात तापी, गिरणा, पांझरा, अनेर आदी नद्यांच्या क्षेत्रात झाली होती. अनेकांनी दिवाळीच्या काळात पूर्वमशागत करून काळ्या कसदार क्षेत्रात पेरणी केली.

काही शेतकऱ्यांना सोयाबीनचे पीक घेतल्यानंतर पेरणी करायची होती, यात विलंब झाल्याने जमिनीतील वाफसा कमी झाला. यामुळे शेत भिजवून त्यात पूर्वमशागत करून दादर ज्वारीची पेरणी करण्यात आली. नोव्हेंबरमध्ये कमाल शेतकऱ्यांनी दादर ज्वारीची पेरणी केली. काही शेतकऱ्यांनी डिसेंबरमध्ये संशोधित, सुधारित प्रकारच्या दादर ज्वारी वाणांची पेरणी केली. तीन वेळेस या पिकात सिंचन करावे लागले.

काही शेतकऱ्यांना पिकात एक वेळेस फवारणीदेखील घ्यावी लागली होती. परंतु कोरडवाहू पिकात रासायनिक खतांचा कुठलाही उपयोग झालेला नाही. अनेकांनी आपल्याकडील पारंपरिक ज्वारी वाणांची पेरणी केली आहे. यामुळे फक्त पेरणी व कापणी, मळणीवर खर्च येत आहे. खते, कीडनाशके यांवरील खर्च नसल्याने पीक परवडत असल्याचे शेतकऱ्यांचे म्हणणे आहे.

डिसेंबरमध्ये पेरणी केलेले दादर ज्वारीचे पीक मळणीवर आले आहे. तर नोव्हेंबरमध्ये पेरणी केलेल्या दादर ज्वारीत मळणी सुरू आहे. कोरडवाहू दादर ज्वारीचे उत्पादन एकरी सात ते आठ क्विंटल येत आहे. तर एक वेळेस सिंचन केलेल्या काळ्या कसदार जमिनीत दादर ज्वारीचे एकरी १० ते १२ क्विंटल उत्पादन येत आहे. कसदार धान्यासह चांगला चाराही दादर ज्वारीतून उपलब्ध होत आहे. एकरी २०० पेंढ्या दादर ज्वारीचा कडबा उपलब्ध होत आहे.

मळणी २० ते २२ दिवस सुरूच राहणार

खानदेशात विविध टप्प्यांत दादर ज्वारीची पेरणी झाली आहे. यामुळे मळणी मागील महिन्यात सुरू झाली. ही मळणी पुढील २० ते २२ दिवस सुरूच राहील. यामुळे बाजारातही ज्वारीची आवक सुरूच राहणार आहे. एप्रिलमध्ये आवक अधिक होईल, असेही चित्र आहे.