Jowar Fodder : मळणीमुळे दादर ज्वारीचा कडबा मुबलक

Jalgaon News : खानदेशात दादर ज्वारीचा कडबा उपलब्ध होण्यास सुरुवात झाली आहे. दादर ज्वारी कापणी, मळणीस गती आल्याने स्थिती कडबा उपलब्ध होत आहे. यंदा दादर ज्वारीचा कडबा मुबलक आहे.

मागील हंगामात दादर ज्वारीच्या कडब्याचे दर साडेचार ते चार हजार रुपये प्रति शेकडा असे होते. यंदा हे दर स्थिर आहेत. ज्वारीची मळणी, काढणी मागील चार ते पाच दिवसांपासून गतीने सुरू आहे. कोरडवाहू दादर ज्वारीच्या कडब्याचे दर अधिकचे असतात.

हा कडबा यंदा बऱ्यापैकी आहे. तो फक्त तापी, अनेर नदीच्या क्षेत्रात उपलब्ध राहणार आहे. कोरडवाहू दादर ज्वारीची पेरणी दिवाळीच्या काळात काळ्या कसदार जमिनीत जळगाव, चोपडा, अमळनेर, धुळ्यातील शिरपूर आदी भागात झाली होती.

या क्षेत्रात पीक मळणी सुरू आहे. काही भागात पीक उशिराने मळणीवर आले आहे. मागील वर्षी दादर ज्वारीच्या कडब्याचे दर प्रति शेकडा चार ते साडेचार हजार रुपयांपर्यंत होते. यंदा दर किंचित कमी राहतील किंवा स्थिर राहतील. कारण चारा पुरेसा आहे.

यंदा खरिपात कमी चारा ओल्या दुष्काळी स्थितीमुळे उपलब्ध झाला. यामुळे चाराटंचाई काही भागात आहे. पण आता चारा मुबलक राहील. कारण रब्बी हंगामातील पिकांची कापणी, मळणी सुरू आहे. दुधाळ पशुधनाला कोरडा चारा मिळू लागला आहे. साठविलेला चारा संपत आला होता.

रब्बीतील कोरडा चारा उपलब्ध होत असल्याने त्याची साठवणूक सुरू झाली आहे. माळरानात आता हिरवा चारा नाही. तूर, सोयाबीनचा भुस्साही संपत आला आहे. तुरीचा भुस्सा फारसा खानदेशात नसतो. कारण तूर पेरणी सर्वत्र नाही. अशा स्थितीत पशुधनाला पुरेसा कोरडा, सकस चारा खाऊ घालणे मध्यंतरी कठीण बनले होते. पण आता चारा मिळत असल्याने ही समस्या दूर होत आहे. यात आगाप पेरणीच्या दादर ज्वारीचा कडबा अधिकचा उपलब्ध होत आहे.

शिवार खरेदीला वेग

खानदेशात बाजार समित्या किंवा अन्य भागात दादर ज्वारीच्या कडब्याची आवक होत नाही. खरेदीदार थेट शिवार किंवा गावातून कडब्याची खरेदी करीत आहेत. कडबा खरेदी करून त्याची कुट्टी केली जात आहे. लागलीच ही कुट्टी वाहतूक करून तिचा साठा केला जात आहे.

खानदेशात धुळ्यातील दुधाळ पशुपालक जळगाव, चोपडा व अन्य भागातून चाऱ्याची खरेदी करीत आहेत. रावेर, मध्य प्रदेशातील बऱ्हाणपूर भागातील दुधाळ पशुपालक व अन्य शेतकरी जळगाव, चोपडा, शिरपूर भागांतून दादरच्या कडब्याची खरेदी करू लागले आहेत.