Jalgaon News : खानदेशात यंदा तूर लागवड सुमारे १६ हजार २०० हेक्टरवर झाली आहे. लागवड यंदा किंचित वाढली असून, जळगाव जिल्ह्यात सुमारे १२ हजार हेक्टरवर तूर पीक आहे. जळगाव जिल्ह्यातील लागवड सुमारे एक हजार हेक्टरने अधिक आहे.

मागील दोन वर्षे तूर लागवड सतत वाढली आहे. अनेकांनी सोयाबीनमध्ये आंतरपीक म्हणून तूर लागवड केली आहे. कापूस पिकातही तुरीचे आंतरपीक आहे. कमी व अधिक पावसातही तूर पीक हाती आले. त्यातून चाराही आला व जमीन सुपीकतेलाही मदत झाली.

शिवाय अन्य पिकांच्या तुलनेत खर्च कमी लागला. कापूस पीक खर्चिक बनले आहे. मजूर, कीडनाशके आदींचा मोठा खर्च कापसावर करावा लागतो. यामुळे तूर लागवडीत वाढ झाली आहे.

लागवड जुलैत पूर्ण

तुरीसाठी खानदेशात जळगावातील मुक्ताईनगर, रावेर, बोदवड, जामनेर हा भाग प्रसिद्ध आहे. तसेच अन्य भागात कापूस पिकात तूर असते. धुळ्यातील धुळे, शिंदखेडा, नंदुरबारमधील नवापूर, नंदुरबार भागांतही तूर लागवड वाढली आहे.

यंदा तुरीखालील क्षेत्रात सुमारे दोन ते तीन टक्के वाढ झाल्याचा अंदाज आहे. लागवड मागील पंधरवड्यातच पूर्ण झाली आहे. अनेकांनी संकरित, संशोधित तूर वाणांची लागवड केली आहे. काही तूर वाणांचा खानदेशात तुटवडादेखील होता.

कापसाऐवजी तूर

कापूस पीक कमी करून तूर लागवडीला यंदा अनेकांनी पसंती दिली. कापसाऐवजी तुरीची लागवड अनेकांनी केली आहे. तूर लागवड मे अखेरीस व जून आणि या महिन्यातही झाली आहे. रावेर, मुक्ताईनगर, बोदवड, जामनेर भागांत अनेकांनी पूर्वहंगामी तुरीची ठिबकवर लागवड केली आहे.

तूर पीक जोमात आहे. पाऊसमान चांगले राहिल्यास सर्वत्र पीक बऱ्यापैकी येईल. पिकात अनेक भागांत दोन वेळेस आंतरमशागतही झाली आहे. तर खतेही देण्यात आली आहेत. लागवड पूर्ण झाली आहे. पुढे क्षेत्रात कोणतीही वाढ होणार नाही, अशी स्थिती आहे.