Poladpur News : मुंबई-गोवा महामार्गावरील कशेडी घाटाला पर्याय असलेल्या दोन बोगद्यांपैकी एका बोगद्यांतर्गत अपूर्ण कामे पूर्ण करण्यासाठी २० सप्टेंबरपासून वाहतूक बंद करण्यात येणार आहे. हा बोगदा गणेशोत्सवाच्या पार्श्वभूमीवर ५ सप्टेंबरपासून वाहतुकीस तात्पुरता मोकळा करण्यात आला होता.

गतवर्षी गणेशोत्सव कालावधीत बोगद्यातून हलकी प्रवासी वाहने सोडण्यात आली होती; मात्र त्यानंतर पुन्हा येथील वाहतूक बंद करण्यात आली. बोगद्याचे काम लवकरात लवकर पूर्ण व्हावे, यासाठी वाहतूक बंद ठेवून काम वेगाने सुरू होते.

यंदा २५ फेब्रुवारीपासून शिमगोत्सवापूर्वी कशेडी बोगद्यातून लहान वाहनांना या बोगद्याचा वापर कोकणात येण्यासाठी करण्याची परवानगी देण्यात आली. एक वर्षानंतर अपूर्ण असलेला दुसरा बोगदाही गणेशोत्सवाच्या तोंडावर मुंबईहून कोकणात जाणाऱ्या वाहनांसाठी सुरू करण्यात आला. त्यामुळे चाकरमान्यांचा प्रवास सुरळीत झाला होता. कशेडी घाटातील ४५ मिनिटांचा वेळ वाचला होता व वाहतूक कोंडीपासूनही मुक्तता मिळाली होती.

बोगदा पूर्णतः बंद

कशेडी बोगद्याच्या अपूर्ण असणारी गटार लाइन, दर्शनी भाग, संरक्षक भिंत, अपूर्ण सिमेंट काँक्रिटीकरणाच्या कामांसह लाइट, डिजिटल वेग टायमिंगची कामे पूर्ण करायची असल्याने गणपती उत्सव संपताच घाईघाईने सुरू करण्यात आलेला बोगदा पूर्णतः करण्याच्या उद्देशाने पुन्हा बंद ठेवण्यात येणार आहे.

खबरदारीचा उपाय

कशेडी घाटाला पर्याय असलेल्या दोन्ही बोगद्यांतील खबरदारीचा उपाय म्हणून बांधकाम खात्याने विशेष काळजी घेतली. दोन्ही बोगद्यांतून प्रवास करताना वाहनांचा वेग कमी ठेवण्यात आला होता. दोन्ही बोगद्यांच्या प्रवेशद्वारावर सुरक्षा कर्मचारी नेमण्यात आले होते. त्यामुळे कशेडी घाटातून येण्याचा चाकरमान्यांचा वेळ वाचला आहे.