Melghat Water Scarcity : मेळघाटच्या पाणीटंचाईला ब्रेक

Amaravati News : जिल्ह्यात झालेल्या दमदार पावसाने मेळघाटमधील पाणीटंचाई ओसरल्याचे चित्र असून टॅंकर तसेच विहीर अधिग्रहणाच्या टेन्शनपासून प्रशासनाची मुक्तता झाली आहे. त्यामुळे अधिकाऱ्यांसोबतच ग्रामस्थांनी सुटकेचा निःश्वास टाकला आहे.

गत मार्च महिन्यापासून ग्रामीण भागात पाणीटंचाईने पाणीपुरवठा विभागाचे टेन्शन वाढविले होते. आता मात्र पावसाळा सुरू होताच मेळघाटातील १२ गावांतील टँकरचे आणि १७० गावांतील विहीर अधिग्रहणाच्या संकटातून मुक्तता झाली आहे. परिणामी नागरिकांना दिलासा मिळाला आहे.

दरवर्षी उन्हाळ्याच्या दिवसांत मेळघाटसह गैरआदिवासी भागात नागरिकांना पिण्याच्या पाणीटंचाईचा सामना करावा लागतो. त्यामुळे संभाव्य पाणीटंचाई निवारणार्थ जिल्हा परिषदेच्या ग्रामीण पाणीपुरवठा विभागामार्फत ग्रामीण भागात पाणीटंचाई आराखडा तयार करून विविध उपाययोजना केल्या जातात.

यंदाही पाणीपुरवठा विभागाने पाणीटंचाई निवारणार्थ टंचाई आराखडा व पूरक आराखड्यात सुमारे १ हजार ८७ उपाययोजना प्रस्तावित केल्या होत्या. यामध्ये नळयोजना विशेष दुरुस्तीच्या २०२ पैकी १८८ उपाययोजना करण्यात आल्या होत्या. याशिवाय तात्पुरती पूरक नळ योजनेची ३०, टँकर २१, विहीर अधिग्रहण ४९३, नवीन विंधन विहीर, कूपनलिका २९१, विहीर अधिग्रहण ४८३ याप्रमाणे योजना प्रस्तावित केल्या होत्या.

त्यानुसार १ हजार ८७ पैकी ३७४ उपाययोजनांना मंजुरी मिळाली होती. यामधून १० उपाययोजना प्रगतिपथावर होत्या. २५ उपाययोजना रद्द करण्यात आल्या, तर ३४० उपाययोजना पूर्ण करण्यात आल्या आहेत.

जून महिन्यापर्यंत या सर्व उपाययोजनांची कार्यवाही आटोपल्यानंतर जुलैपासून जिल्ह्यात पावसाने हजेरी लावताच ग्रामीण भागातील पाणीटंचाई निवारणार्थ सुरू असलेल्या २१ टँकरची व १२३ विहीर अधिग्रहणाद्वारे पाणीपुरवठ्यातून सुटका झाली आहे.

परिणामी आता मेळघाटसह ग्रामीण भागातील पाणीटंचाई मिटली असून पाणीपुरवठा विभागाचे टँकर व विहीर अधिग्रहणाद्वारे होणाऱ्या पाणीपुरवठ्याच्या समस्येचे टेन्शन मिटले आहे.

या गावात सुरू होते टँकर

मेळघाटातील चिखलदरा तालुक्यातील आकी, खडीमल, मोथा, लवादा (शहापूर), तारुबांदा, गौलखेडा बाजार, मेहरीआम, बहादरपूर, धरमडोड, गवळीढाणा कोरडा, आलाडोह, खिरपाणी आणि चांदूररेल्वे तालुक्यातील सावंगी मग्रापूर आदी गावांत टँकरद्वारे पाणीपुरवठा सुरू होता. आता मात्र या सर्व गावांतील पाणीपुरवठ्याचे टँकर बंद झाले आहेत.