Nanded Water Stock : नांदेडमधील पाणीसाठा ३१ दलघमीने वाढला

Nanded News : जिल्ह्यात मागील आठवड्यात झालेल्या पावसामुळे नदी-नाल्यांना पाणी आले. परिणामी नांदेड पाटबंधारे विभागातर्गत येणाऱ्या १०४ प्रकल्पात ३१ दशलक्ष घनमीटरने पाणी पातळीत वाढ होऊन सध्या ४३.२१ टक्क्यानुसार ३१४.६१ दलघमी पाणीसाठा झाल्याची माहिती नांदेड पाटबंधारे विभागाकडून देण्यात आली.

नांदेड जिल्ह्यात मागील आठवड्यात पावसाने सर्वच ठिकाणी चांगली हजेरी लावली. त २६ जुलैला झालेल्या जोरदार पावसामुळे जिल्ह्यातील १७ मंडळात अतिवृष्टीची नोंद झाली होती. यासोबतच विष्णुपुरी प्रकल्पाच्या पाणलोट क्षेत्रात पाऊस झाला. यामुळे नदी-नाल्यांना पाणी आले. नांदेड पाटबंधारे विभागाने विष्णुपुरी प्रकल्पाचे चार दरवाजे उघडून गोदावरी नदीत पाणी सोडले.

सध्या नांदेड शहराला पाणी पुरवठा करणाऱ्या विष्णुपुरी प्रकल्पात ६८.३६ दशलक्ष घनमीटरनुसार ८४.६१ टक्के पाणीसाठा झाला आहे. दुसरा मोठा प्रकल्प असलेल्या मानार (बारुळ) प्रकल्पात ८०.०६ दलघमीनुसार ५७.९३ टक्के पाणीसाठा आहे. यासोबतच जिल्ह्यातील नऊ मध्यम प्रकल्पात ६२.९० दलघमीनुसार ४५.२३ टक्के पाणीसाठा आहे.

चार कोल्हापुरी बंधाऱ्यात ०.१३ दलघमीनुसार ०.०१ टक्के पाणीसाठा आहे. ८० लघू प्रकल्पात ३७९.९७ दलघमीनुसार ४६.२८ टक्के पाणीसाठा आहे. नऊ उच्च पातळी बंधाऱ्यात २३.३१ दलघमीनुसार १२.२८ टक्के पाणीसाठा आहे. जिल्ह्यात एकूण १०४ प्रकल्पात ३१४.६१ दशलक्ष घनमीटरनुसार ४३.२१ टक्के पाणीसाठा शिल्लक आहे.

मागच्या आठवड्यात २८३.६३ दशलक्ष घणमीटर पाणीसाठा शिल्लक होता. यात आता ३१ दलघमीने वाढ झाली आहे. सोबतच नांदेड जिल्ह्याशेजारी असलेल्या परभणी जिल्ह्यातील येलदरी प्रकल्पात ६३३.७८ दलघमीनुसार ७८.२७ टक्के पाणीसाठा आहे.

तर सिद्धेश्‍वर प्रकल्पात ४९.८१ दलघमीनुसार ६१.५२ टक्के पाणीसाठा आहे. तसेच यवतमाळ जिल्ह्यातील ऊर्ध्व पैनगंगा (इसापूर) या प्रकल्पात ६१८.२९ दलघमीनुसार ८०.९४ टक्के पाणीसाठा झाल्याची माहिती नांदेड पाटबंधारे मंडळ विभागाकडून देण्यात आली.

नांदेड पाटबंधारे मंडळातील प्रकल्पनिहाय पाणीसाठा

प्रकल्प दलघमी टक्केवारी

विष्णुपुरी ६८.३६ ८४.६१

मानार ८०.०६ ५७.९३

मध्यम प्रकल्प(९) ६२.९० ४५.२३

लघू प्रकल्प(८०) ७९.९७ ४६.२८

उच्चपातळी बंधारे(९) २३.३१ १२.२८

एकूण प्रकल्प१०४ ३१४.६१ ४३.२१

जिल्ह्याशेजारील प्रकल्प

येलदरी ६३३.७८ ७८.२७

सिद्धेश्‍वर ४९.८१ ६१.५२

इसापूर ६१८.२९ ८०.९४