Chh. Sambhajinagar News : मराठवाड्यातील सर्वांत मोठे जायकवाडी प्रकल्पातील उपयुक्त पाणीसाठा ३८.१५ टक्क्यांवर पोहोचला आहे. गुरुवारी (ता. २६) सकाळी सहा वाजताच्या सुमारास जायकवाडीत गोदावरी पात्रातून सुमारे १६२४८ क्युसेकने पाण्याची आवक सुरू होती.

गतवर्षी आजच्या तारखेत जायकवाडीत ४.६१ टक्के उपयुक्त पाणीसाठा होता. जलसंपदा विभागाच्या माहितीनुसार यंदा १ जूनपासून आतापर्यंत जायकवाडी प्रकल्प २१५.९९०० दलघमी अर्थात ७.६२६८ टीएमसी पाण्याची आवक झाली.

आताच्या घडीला निम्न दुधना प्रकल्पात ३५.६९ टक्के,येलदरीत ४९.८०टक्के, सिद्धेश्‍वेरमध्ये २०.५४ टक्के माजलगाव मध्ये ११.१९० टक्के मांजरा २७.७२ टक्के पैनगंगा ४३.४७ टक्के, मानारमध्ये ५१.९१ टक्के, निम्न तेरणामध्ये ७०.१८ टक्के, विष्णुपुरीत २३.२२ टक्के, तर सीना कोळेगाव प्रकल्पात ४६.५७ टक्के उपयुक्त पाणीसाठा झाला आहे.

११ मोठ्या प्रकल्पांत ७१ टीएमसी उपयुक्त पाणीसाठा

जायकवाडीसह ११ मोठ्या प्रकल्पात आत्ताच्या घडीला ७१.८८ टीएमसी उपयुक्त पाणीसाठा झाला आहे. त्यामध्ये जायकवाडीतील २९.२४ टीएमसी पाणीसाठासह निम्न दुधना प्रकल्पातील ३.०५ टीएमसी, येलदरीमधील १४.२४ टीएमसी, सिद्धेश्‍वरमधील ०.५९ टीएमसी, माजलगावमध्ये १.३० टीएमसी पाणीसाठी आहे.

तर मांजरा १.७३ टीएमसी, पैनगंगा १४.८० टीएमसी, माणार २.३३ टीएमसी, निम्न तेरणा २.२६ टीएमसी, विष्णुपुरी ०.६६ टीएमसी, तर सीना कोळेगाव प्रकल्पातील १.४७ टीएमसी उपयुक्त पाणी साठ्याचा समावेश आहे. गत वर्ष आजच्या तारखेला या सर्व प्रकल्पांमध्ये २३.४७ टीएमसी पाणीसाठा होता.