Onion Rate : नाशिक : सरकारने कांदा उत्पादकांना मदत करण्यासाठी हस्तक्षेप न केल्यास मुख्यमंत्री, उपमुख्यमंत्री, पणनमत्री व कृषिमंत्री यांच्या दारात कांदे ओतण्याचे आंदोलन किसान सभा हातात घेईल, असा इशारा किसान सभेने दिला आहे.  

नाशिक जिल्ह्यातील सुरगाणा तालुक्यातील बारे गावी शेतकऱ्यांची जिल्हास्तरीय जाहीर सभा घेऊन किसान सभेने हा इशारा दिला आहे.

किसान सभेच्या नाशिक जिल्हा अधिवेशनाच्या पार्श्वभूमीवर संपन्न झालेल्या या जाहीर सभेसाठी जिल्ह्यातील इतर शेतकऱ्यांसोबत कांदा उत्पादक शेतकरी उपस्थित होते.

यावेळी किसान सभेचे माजी अध्यक्ष जे. पी. गावीत, किसान सभेचे केंद्रीय सहसचिव डॉ. अजित नवले यांच्यासह किसन गुजर, सुभाष चौधरी, सावळीराम पवार, सुनील मालुसरे, इरफान शेख, इंद्रजित गावीत, मोहन जाधव, भिका राठोड, धर्मराज शिंदे, हणमंत गुंजाळ, नवनाथ दळवी, त्रंबक ठाकरे आदी कार्यकर्ते यावेळी उपस्थित होते.

कांद्याचा दर कोसळल्याने शेतकरी हवालदिल झाले आहेत. त्यामुळे राज्यातील भाजप-शिंदे सरकारने या पार्श्वभूमीवर तातडीने हस्तक्षेप करण्याची आवश्यकता आहे.

मात्र सरकार सत्तेच्या साठमारीत मश्गुल असल्याने शेतकऱ्यांच्या प्रश्नाकडे लक्ष देत नाही.

सरकारने शेतकऱ्यांची उपेक्षा थांबवावी व कांदा उत्पादकांना तातडीने मदत करावी, अशी मागणी किसान सभेने केली आहे.

तसेच कांदा उत्पादकांना दिलासा देण्यासाठी कांद्याला तातडीने निर्यात अनुदान देत कांदा निर्यातीला प्रोत्साहन द्यावे व  कांदा उत्पादकांना प्रतिक्विंटल ६०० रुपये अनुदान जाहीर करावे अशी मागणी किसान सभेने केली आहे.

कांद्याचे दर निश्चित करणाऱ्या लासलगाव, पिंपळगाव बसवंत, सिन्नर, मनमाड, चांदवड व नांदगाव बाजार समित्या, तसेच नगर व पुणे जिल्ह्यातील बाजार समित्यांमध्ये शेतकऱ्यांच्या सभा आयोजित केली. आणि कांदा उत्पादकांसाठी आक्रमक आंदोलन उभे करण्याचा संकल्प किसान सभेने केला आहे.